Jabuuroolu 18 - Mandinka Bible

Tankoo ka bo Alla le bulu

Meŋ be suukuulaa ñaatonkayaa la: Dawuda la Jabuuroo le mu, Yaawe la dookuulaa. A ye ñiŋ suukuwo laa Yaawe le ye, kabiriŋ Yaawe ye a tankandi a jawoolu bee ma, aniŋ Sawulu bulu. A ko:

¹ Hee Yaawe*, i la kuwo be n jusukuŋo le to, ite meŋ mu n semboo ti.

² Yaawe le mu n na semberaŋ bere baa ti, n na tankaraŋ tatoo, aniŋ m bondilaa. N na Alla le mu n ye semberaŋ beroo ti, n ka n dende meŋ na. Ate le mu n na koteeroo* ti, n na kiisandirilaa sembemaa baa, aniŋ n tuukuraŋo.

³ Ŋa Yaawe daani, meŋ jarita ka jayi, aduŋ n tankata n jawoolu ma.

⁴ Saayaa wereŋolu ye n kuru le, kasaaroo jiibalimmaa ye n samba.

⁵ Kaburoo silaŋo dunta n na, saayaa silaŋo semboo sutiyaata n na.

⁶ N na niikuyaa kaŋ, ŋa Yaawe kumandi, ŋa n na Alla kumandi ka m maakoyi. Ka bo naŋ a batudulaa to, a ye n kaŋo moyi, a tuloo ye n kumboo kaŋo moyi le.

⁷ Bankoo jarajarata, konkoolu fondamaŋolu jiijaata. Ì maamanta le, kaatu a kamfaata le.

⁸ Siisiyo bota naŋ a nuŋo kono, dimbaa bota naŋ a daa kono, dimbaa keñemboo bota a bala.

⁹ A ye saŋ fatoo fara naŋ, a jiita duuma, saŋ tawaloolu be a sindafatoolu bala.

¹⁰ A loota kerubu malaayikoo* kaŋ, a tiita. A tiita komeŋ foñoo.

¹¹ A ye a faŋ muuri diboo la, tawali dibiriŋolu mennu be faariŋ jiyo la, ì ye a muru.

¹² Fanuñaa meŋ be a ñaatiliŋo la, saŋ beroolu niŋ dimbaa ŋalasoo ka bo a bala.

¹³ Yaawe sarita naŋ ka bo Arijana, Mansa Tallaa kaŋo moyita.

¹⁴ A ye beñoolu fayi, jawoolu janjanta. Ŋalasi baa kuntuta ì ñaato, a ye ì borindi.

¹⁵ Fankaasoo duuma, wulumbaŋolu fintita jee, kabiriŋ ite Yaawe ye i jawoolu tindi niŋ i la niijii foñoo la. Duniyaa fondamaŋolu kenseŋyaata, i la dandalaaroo waatoo la.

¹⁶ A ye a buloo saba ka bo naŋ santo, ka m muta, a ye n saba naŋ jii diinondiŋo kono.

¹⁷ A ye n tankandi n jawu sembemaa baalu ma, mennu ye n koŋ, wolu le semboo warabaata n ti.

¹⁸ Niŋ m bulata bataa kono, ì ka m boyinkaŋ ne, bari Yaawe le ka ke m maakoyilaa ti.

¹⁹ A ye m fintindi kene fanuñaa to, a ye n tankandi, kaatu n na kuwo ye a seewoo le.

²⁰ Yaawe, i ye n kiitindi n na tiliŋo le kaŋ, n na sootaaribaliyaa be ñaameŋ, i ye n joo wo le ñaama.

²¹ Kaatu ŋa ite Yaawe la siloolu nooma le, m maŋ kuu kuruŋo ke, ka n koo dii n na Alla la.

²² Ŋa i la luwaalu bee taamandi le, aduŋ m maŋ n ñaa kaasi i la yaamaroolu la.

²³ I ye a loŋ ne ko, m maŋ sika soto, aduŋ ŋa m faŋo tankandi junube kuwo la le.

²⁴ Yaawe, i ye n joo n na tiliŋo le kaŋ, n na seneyaa i la karoo la.

²⁵ Moo tilindiŋolu, i ka i la tiliŋo yitandi wolu le la. Moo meŋ kendeyaata baake, i ka kendeyaa wo le fee.

²⁶ Moo meŋ seneyaata, i ka seneyaa wo le fee, bari mennu jenketa, i ka jawuyaa wolu fee le.

²⁷ I ka fammajiilaalu tankandi le, bari i ñaa ka tara faŋ sikandilaalu kaŋ ne, ka ì jindi.

²⁸ Hee Yaawe, ite le mu n na lampoo ti. Yaawe, i ye n na diboo faliŋ n ye maloo le la.

²⁹ I la maakoyiroo kaŋ, n ka haañi le, ka kelediŋ kafoo boyinkaŋ. N na Alla la deemaaroo kaŋ, n ka sawuŋ tata sansaŋolu la.

³⁰ Alla la siloolu maŋ sootaari soto, Yaawe la kumoo maŋ tana soto. Moolu mennu ka tankoo ñini i bulu, i keta ì la koteeroo le ti.

³¹ Alla te keriŋ, Yaawe koolaa. Aduŋ jumaa le mu semberaŋ beroo ti ǹ na Alla koolaa?

³² Alla, ite le ye m fandi semboo la, aduŋ ite le ye n na siloo beteyandi.

³³ I ye n siŋolu ke le ko minaŋo siŋolu. I ye m maakoyi le ka loo dulaa jaŋolu santo.

³⁴ I ye m buloolu nindi keloo la, fo m buloolu si jaawali kaloo saba noo ka a fayi.

³⁵ I ye i la tankoo koteeroo dii n na, aduŋ i bulubaa buloo le ka m balundi. I la maakoyiroo ye n kummaayandi.

³⁶ M be siloo meŋ kaŋ, i ye a fanundi n ye fo n siŋo kana taki.

³⁷ Ŋa n jawoolu bayindi, ŋa ì soto. M maŋ muruŋ kooma, fo ŋa ì kasaara.

³⁸ Ŋa ì faa le, aduŋ ì te wuli noo la. Ì boyita le, n siŋolu loota ì kaŋ.

³⁹ I ye m fandi semboo la ka keloo ke, i ye a ke, n jawoolu ñoyita n siŋolu daala.

⁴⁰ I ye a ke, n jawoolu ye ì koo dii n na ì niŋ boroo, aduŋ ŋa n jawoolu kasaara le.

⁴¹ Ì ye maakoyiroo kumboo, bari moo te jee, meŋ si ì tankandi. Ì woosiita Yaawe ye, bari a maŋ ì danku.

⁴² Wo to le ŋa ì buutee kendeke, fo ŋa ì bee faa. Ŋa ì tuu le, ŋa ì doriŋ-doriŋ ko potoo, meŋ be mbeedoolu kaŋ.

⁴³ N na moolu mennu naata m boyinkaŋ, i ye n tankandi ì ma, i ye n ke bankoolu la ñaatonkoo ti. M maŋ moolu mennu loŋ, ì bee ye m batu,

⁴⁴ aduŋ tumarankewolu naata le, ka ñoyi n ye. Niŋ ì ye n na kumoo moyi doroŋ, ì ka n horoma le.

⁴⁵ Ì bee ka jikilateyi le, ì jarajaratoolu ka bo naŋ ì la tatoolu kono.

⁴⁶ Yaawe be baluuriŋ ne! Jayiroo be n na semberaŋ beroo ye, Alla too buuñaariŋo, n tankandilaa.

⁴⁷ Ite le mu Alla ti, meŋ ka i joo n jawoolu to. I ka bankoolu ke n na maroo to.

⁴⁸ I ka m bondi n jawoolu bulu, i ye n ke n jawoolu bee ñaato. Fitina moolu la karoo la, i ye n tankandi le.

⁴⁹ Hee Yaawe, saayiŋ n ñanta i tentu la bankoolu kaŋ ne, m be jayiri suukuwolu laa la niŋ i too la le.

⁵⁰ I ye kañee baa le dii i la mansa la. I ye kanu bambaloo le yitandi i la tomboŋ moo la. I ye a ke Dawuda niŋ a koomalankoolu le ye fo abadaa.