Jabuuroolu 17 - Mandinka Bible

Alla ka moolu kiisa le, mennu ka tankoo ñini a bulu

Dawuda la duwaa.

¹ Hee Yaawe*, i lamoyi n na kumboo la, i ye kiitiyo teyi n ye. I tuloo loo n na duwaa la, neeneeri kuma te n daa.

² I faŋo ye n na kuwo koyindi, ka a juubee meŋ tilinta i ñaa koto.

³ Hani niŋ i ye n sondomoo kono kusonsoŋ, i ye n kisikisi suutoo la, i ye n kotobo, i te kuu kuruŋo tara la n kono. Ŋa tawoo taa le ko n daa te kuma jawu fo la.

⁴ Moo doolu ka a ke ñaa-wo-ñaa, bari nte wo de, ŋa i la yaamaroo muta le, ka m faŋ kanta fitina moolu la siloo ma.

⁵ N ka tu i la taaraŋ siloo le kaŋ, m buka i la siloo lamfee.

⁶ Hee Alla, ŋa i kumandi le, kaatu i be n danku la le. I tuloo tu n to, ka n na kumoolu moyi.

⁷ I la kanu bambaloo la kaawakuuyaa yitandi n na, ite Kiisandirilaa, meŋ ka moolu kiisa, mennu ka tankoo ñini i bulu ì jawoolu ma.

⁸ N kanta ko moo ka a ñaakesoo kanta ñaameŋ. M maabo i la tankoo dampammaa koto,

⁹ ka n tanka moo kuruŋolu la maasiiboo ma, n jawoolu mennu ye m muruŋ-muruŋ karoo bee la, ka n niyo ñini.

¹⁰ Balafaa te ì sondomoo kono. Ì ka faŋ wara kumoolu le fo ì daalu la.

¹¹ Ì be sutiyaa kaŋ n na le. Ì ye m murubeŋ ne silaŋ. Ì ñaalu ka tu looriŋ n kaŋ, ñiŋ kamma la ì si m boyindi.

¹² Ì jatamaalu le be hameriŋ ka m faraŋ-faraŋ, ì be bitiriŋ ne komeŋ jatoo, ka ñapi n kaŋ.

¹³ Yaawe, wuli i ye ì kuntuntee, ka ì busandi. N niyo tanka moo kuruŋolu ma, ka bo niŋ i la hawusaroo* la.

¹⁴ Yaawe, ka bo niŋ i semboo la, n tanka moo halakiriŋolu ma, mennu la joo mu duniyaa kuwo doroŋ ne ti. Allamaa i ye ì soodindi jaraboo la, i ye meŋ maabo ì kamma. Allamaa ì diŋolu taa ye tambi wo la, fo too ye tu ì koomalankoolu ye.

¹⁵ Bari nte de, m be tara la i fee le, n na sootaaribaliyaa kaŋ. Niŋ n wulita, m be wasa la i ñaatiliŋo la le.