Jabuuroolu 16 - Mandinka Bible

Dankeneyaa suukuwo

Dawuda la Jabuuroo.

¹ Hee Alla, n kanta, kaatu m be tuukuriŋ ite le la, ka n tankandi.

² Ŋa ñiŋ ne fo ite Yaawe* ma ko, “Ite le mu m Maariyo ti. Nte maŋ kuu kende soto ite koolaa.”

³ Lannamoolu mennu be bankoo kaŋ, wolu le foroyaata. Ì la kuwo ka n seewoo le.

⁴ Moolu mennu jarabita batufeŋ koteŋolu la, ì ka mantoora jamaa le saabu ì faŋ ma. N te kafu la ì ma ka yeloo boŋ sadaa* ti, sako ka wo batufeŋolu too kumandi.

⁵ Nte la niiboroo ka bo ite Yaawe le bulu, aduŋ n suulafeŋo bee sumandiŋo be i bulu le. M baluuñaa be ite le bulu.

⁶ I ye n niibo meŋ na n na baluwo kono, a keta kuu neemariŋo le ti. Tooñaa, a keta n ye keetaafeŋ kendoo le ti.

⁷ Ŋa Yaawe tentu, kaatu a ka n yaamari le, aduŋ suutoo fanaa n sondomoo ka n dandalaa le.

⁸ N hakiloo ka tu ñiŋ kaŋ ne ko, Yaawe be m fee le waati-wo-waati. A ka tara n daala le, wo kamma la feŋ te m bondi la n noo to.

⁹ Wo kamma la n ka jusulaa le, n niyo ka seewoo. M baloo fanaa be tara la tankoo le kono.

¹⁰ I te n tu la saayaa kono. I te soŋ na, i la lannamoo ye taa kaburoo kono.

¹¹ I ka baluwo siloo le yitandi n na. Ka tara i ñaatiliŋo la, wo le mu seewoo timmariŋo ti. Ka tara i bulubaa karoo la, wo ka n jusulandi le fo abadaa.