Jabuuroolu 15 - Mandinka Bible

Seneyaa

Dawuda la Jabuuroo.

¹ Hee Yaawe*, jumaa le si tara noo i batudulaa kono? Jumaa le si sabati noo i la konko senuŋo* kaŋ?

² Wo mu moo le ti meŋ baluuñaa maŋ sootaaroo soto, aduŋ a kekuwolu ka tiliŋ ne, a fokumoolu ka ke tooñaa le ti, aniŋ konotoseneyaa.

³ A buka moo tiñaa a neŋo la, aduŋ a buka kuu jawu ke a teeri la, waraŋ ka jutunnayaa kuma fo a siiñoo ma.

⁴ A ka junubentuŋolu koŋ ne, bari a ka moolu horoma le mennu ye Yaawe kuliyaa. A ka a la laahidoo muta le, a si dimiŋ a fee ñaa-wo-ñaa.

⁵ A buka a la kodoo dontolaa ka lankaŋo ñini, aduŋ a buka dukoo muta ka moolu la boloo taa, mennu maŋ kuu jawu ke. Moo meŋ ka kuwolu taamandi teŋ, wo te wutu la a noo to.