Jabuuroolu 149 - Mandinka Bible

Jayiroo Alla ye

¹ Ali Yaawe* jayi! Ali suukuu kutoo laa Yaawe ye. Ali a jayi, a la lannamoolu la beŋo to.

² Banisirayilankoolu, ali jusulaa ali Daamansoo la kuwo to. Siyoni* moolu, ali seewoo ali la Mansa la kuwo to.

³ Ali a jayi a too la, ali niŋ doŋo. Ali maakaŋ diimaa ke a ye niŋ tambuuroo la, aniŋ kontiŋo.

⁴ Yaawe ka kontaani a la moolu la kuwo la le. A ka horomoo dii fammajiilaalu la le ka bo niŋ nooroo la ì jawoolu kaŋ.

⁵ Alla la lannamoolu ye seewoo a la horomoo la, ì si suukuwo laa ì laadulaalu to, seewoo kamma la.

⁶ Ì ye wuuri ka Alla jayi niŋ suukuwolu la, ì la hawusari* daa fuloo ye tara cafuriŋ ì buloolu kono.

⁷ Ì si wo ke ka julujoo taamandi bantalankoolu kaŋ, ka wo moolu jarabi,

⁸ ì si ì la mansoolu siti joloolu la, ka neejoloolu bula ì la moo kummaalu la,

⁹ ka kiitiyo taamandi ì kaŋ meŋ safeeta ì la kuwo to. Wo mu Alla la lannamoolu ye horomoo le ti. Ali Yaawe jayi.