Jabuuroolu 146 - Mandinka Bible

Ka Alla jayi, a la maakoyiroo la

¹ Ali Yaawe* jayi. Nte be Yaawe jayi la n niyo le la.

² M be kali Yaawe jayi la n na baluwo bee le kono. Niŋ m be n niyo la, m be suukuwo laa la n na Alla ye le.

³ Kana i jikoo loo maralilaalu kaŋ, hadamadiŋo meŋ te tankandiri ke noo la.

⁴ Niŋ a niyo bota, a ka muru le ka ke bankumunkoo ti. Wo luŋo faŋo le mu a hame kuwolu ka tiñaa.

⁵ Seewoo be moo le ye meŋ ye Yaakuba la Alla muta a la maakoyirilaa ti, meŋ ye a jikoo loo Yaawe kaŋ, a la Alla.

⁶ Ate le ye saŋo niŋ bankoo daa, aniŋ fankaasoo, ka taa feŋolu mennu bee be ì kono, aduŋ a ka tu tilindiŋ a la laahidoolu kaŋ ne fo abadaa.

⁷ Yaawe le ka kiitiyo teyi moo toorariŋolu ye, a ye ì boloo dii ì la, aduŋ a ka domoroo dii moo konkoriŋolu la le. Yaawe le ka mutamoolu firiŋ.

⁸ Yaawe le ka finkintewolu ñaalu yelendi. Ate le ka moolu wulindi mennu jiranta. Ate le ka moo tilindiŋolu kanu.

⁹ Yaawe le ka tumarankewolu tankandi, a ka furuyaamusoolu maakoyi, aniŋ aliyatiimoolu, bari a ka moo kuruŋolu la siloo yelemandi ì ye kasaaroo le ti.

¹⁰ Yaawe le be tu la mansayaa la fo abadaa. Alitolu Siyoni* moolu, ali la Alla le be tu la mansayaa la fo abadaa. Ali Yaawe jayi.