Jabuuroolu 145 - Mandinka Bible

Alla la waroo niŋ a la beteyaa

Jayiri suukuwo. Dawuda la Jabuuroo le mu.

¹ Alla, n na Mansa, m be i la waroo suukuu la le, ŋa i tentu i too la fo abadaa.

² Luŋ-wo-luŋ m be i tentu la le, ŋa i jayi i too la fo abadaa.

³ Yaawe* warata le, a ñanta jayi la le famfaŋ, a la waroo tambita sumaŋo la le.

⁴ Yaawe, jamaani-wo-jamaani be i la keroolu kidimandi la le, ì be kali i la kaawakuu baalu seyinkaŋ na le.

⁵ Ì be i la horomoo fo la le, aniŋ i la mansayaa semboo, nte be m miira la i la kaawakuwolu la le.

⁶ Moolu be a saata la le, i la kaawakuu baalu silaŋo warata ñaameŋ, nte be i la waroo kankulaa la le.

⁷ Ì be i la beteyaa baa seyinkaŋ na le, ì ye i la tiliŋo laa suukuwo ti.

⁸ Yaawe hiinanteeyaata le, aduŋ a la balafaa warata, a buka kamfaa juuna, a la kanu bambaloo maŋ dandulaa soto.

⁹ Yaawe beteyaata moo bee le fee, a ka balafaa soto a la daafeŋolu bee le ye.

¹⁰ Yaawe, i la daafeŋolu bee be i jayi la le, i la lannamoolu bee ye i tentu.

¹¹ Ì be i la mansayaa la horomoo fo la le, aniŋ i la semboo,

¹² ka hadamadiŋolu londi i la kaawakuu baalu la, aniŋ i la mansayaa horomoo la waroo.

¹³ I la maraloo be tu la le fo abadaa, i la noo ye tu jamaanoolu bee la. Yaawe ka tu tilindiŋ a la laahidoolu kaŋ ne, a ka balafaa yitandi a la keroolu bee to.

¹⁴ Yaawe ka moolu maakoyi le mennu be boyoo daa to, a ye moolu sikandi mennu be jirandiŋ.

¹⁵ Niilamaa bee jikoo be looriŋ ite Yaawe le kaŋ, i ka domoroo dii ì la a waatoo le la.

¹⁶ I ka a dii ì la le a ye sii, i ye a dii ì la burayi.

¹⁷ Yaawe tilinta a kekuwolu bee le to, a ka balafaa yitandi a la keroolu bee to.

¹⁸ Yaawe be sutiyaariŋ moolu la le mennu ka a kumandi, mennu ka a kumandi sondome seneyaa kono.

¹⁹ A ka moolu bee la suuloo timmandi le, mennu ye a kuliyaa. A ka ì la woosiyolu moyi le, a ye ì tankandi.

²⁰ A ka moolu bee kanta le mennu ye a kanu, bari a be moo kuruŋolu bee kasaara la le.

²¹ Wo to, nte be tu la Yaawe jayi la le. A la daafeŋolu bee, ali a tentu a too senuŋo la fo abadaa.