Jabuuroolu 144 - Mandinka Bible

Tankoo niŋ firiŋo duwaa bankoo ye

Dawuda la Jabuuroo.

¹ Tentoo be Yaawe* ye, n na semberaŋ beroo, ate le ye n nindi keloo la, fo m buloo koyita lewu.

² Ate le mu m maakoyilaa kendoo ti, aniŋ n na tatoo. A mu n ye tata bambandiŋo le ti, aniŋ n na kiisandirilaa. A mu n ye tankaraŋ koteeroo* le ti, n ka bambu ate le kooma. Ate le ka banku koteŋ moolu noo ka ì ke n na maroo to.

³ Yaawe, moo mu muŋ ne ti fo i hakiloo ka bula a la? Hadamadiŋo mu muŋ ne ti fo i ka a hati?

⁴ Moo la baluwo la sutiyaa be le ko, niiseloo niŋ niijiyo teema, a ka yeemaŋ ne katabake komeŋ niiniyo.

⁵ Kooni Yaawe, i la saŋ fatoolu yele, i ye jii duuma. Konkoolu maa, ì ye siisii.

⁶ I la saŋ ŋalasoo ŋalasindi, i ye i jawoolu janjandi. I la kalabeñoolu fayi, i ye ì kidindi.

⁷ I buloo tiliŋ ka bo naŋ santo, i ye n cansu ka n kiisa jii diinondiŋo kono, ka m bondi banku koteŋ moolu bulu,

⁸ wolu mennu ka faniyaalu fo, ì ka kali faniyaa kaŋ.

⁹ Hee Alla, m be suukuu kutoo laa la i ye le. M be a laa la i ye niŋ kooraa le la.

¹⁰ Ite le ka nooroo dii mansoolu la, aduŋ ite le ye Dawuda tankandi, i la dookuulaa.

¹¹ N tanka jawu la hawusaroo* ma, i ye m bondi banku koteŋ moolu bulu, mennu ka faniyaalu fo, aduŋ ì ka kali faniyaa kaŋ ne.

¹² Allamaa ǹ dinkewolu ye ke ì la fondinkeeyaa kono komeŋ yiri mendiŋolu. Allamaa ǹ dimmusoolu ye ke komeŋ samasiŋ ñiimaalu mennu ka tara mansabuŋo tonkoŋolu la, ka a muta.

¹³ Allamaa ǹ na buntuŋolu ye faa siimaŋo siifaa bee la. Allamaa ǹ na beeyaŋolu ye jiidi wuliwuloolu la, hani fo wuli taŋolu, ǹ na kenoolu kono.

¹⁴ Allamaa ǹ na tuuraalu ye duni jamaalu yoronna. Allamaa saatewo tata sansaŋo kana teyi, moo kana taa mutoo kono. Allamaa maasiiba kumboo kana ke ǹ na mbeedoolu kaŋ.

¹⁵ Seewoo be banku le moolu ye, wo neemoolu keta mennu ye. Seewoo be moolu le ye mennu la Alla mu Yaawe ti.