Jabuuroolu 142 - Mandinka Bible

Duwaaraŋo ka tanka mantoora moolu ma

Dawuda la suukuwo, kabiriŋ a be maaboriŋ berehuwo kono. Duwaa le mu.

¹ Ŋa n kaŋo bula le ka kumboo Yaawe* ye. Ŋa n kaŋo bula le ka a daani.

² Ŋa n na kuwo bee laa a ñaa koto le, ka n na mantooroolu fo a ye.

³ Niŋ n jikilateyita, ite le ka n taaraŋ siloo koroosi. N taaraŋ siloo kaŋ, n jawoolu ye kutindiŋo le laa n ye jee.

⁴ Ŋa m bulubaa karoo la juubee le ka koroosiroo ke, bari moo maŋ n kalamuta. Tankadulaa te n ye, moo maŋ n hati.

⁵ Hee Yaawe, n kumboota i ye le ka m maakoyi. N ko ite le mu n na tankandirilaa ti. Ŋa ite le soto n na baluwo to.

⁶ I lamoyi n na woosiikaŋo la, kaatu n korita le las. N tanka n toorandilaalu ma, kaatu itolu le semboo warata n ti baake.

⁷ M bondi detoo kono, fo n si tenturoo dii noo i la. Moo tilindiŋolu be kafu la m ma le, bayiri i ye beteyaa baa le yitandi n na.