Jabuuroolu 141 - Mandinka Bible

Wulaara duwaa

Dawuda la Jabuuroo.

¹ Hee Yaawe*, n ka ite le kumandi, naa m maakoyi katabake. I lamoyi n na, niŋ ŋa i kumandi.

² N na duwaa muta, a ye ke i fee ko cuuraayi siisii diimaa, aniŋ ŋa m buloo meŋ wulindi ka duwaa, i ye a muta n ye wulaara sadaa ti.

³ Yaawe, m maakoyi ka n daa mara, aniŋ ka n kekuu m fokumoolu to.

⁴ N sondomoo kaarindi kuu jawoo ma, n kana m faŋ duŋ kuu jawu kewo to, ka bo niŋ moolu kafuñooyaa la, mennu ka junuboo ke. N tanka ñiŋ ma ka kafu ì ma ì la bidaŋ domoroolu to.

⁵ Niŋ moo tilindiŋo le ye m busa, wo mu m fee konotodiyaa le ti. A la n jalayoo, wo mu tulu seeralaa le ti n kuŋo to, a te ke la m fee kasi ti. Bari n ka duwaa le kuruŋolu la kuruŋyaa ye daŋ.

⁶ Niŋ ì ye ì la maralilaalu boyindi naŋ konkoo santo, moolu be soŋ na le ko, n na kumoolu mu tooñaa le ti.

⁷ Komeŋ niŋ moo ye bankoo sene a ka a yelemandi ñaameŋ ka beroolu bondi, ì kuloolu be tara la janjandiŋ kaburu daala wo le ñaama.

⁸ Hee Yaawe m Maariyo, nte ŋa n ñaa tiliŋ ite le la, ŋa tankoo ñiniŋ ite le bulu, kana m bula ŋa kasaara.

⁹ N tanka jaloolu ma, ì ye mennu laa n kamma, aniŋ moo jawoolu la kutindiŋolu.

¹⁰ Allamaa moo kuruŋolu ye boyi ì faŋolu la jaloolu kono, bari nte si tambi kuuke tankoo kono.