Jabuuroolu 132 - Mandinka Bible

Mansa la kuwo duwaa

Moolu ka ñiŋ suukuwo le laa, niŋ ì be Alla Batudulaa Buŋo* waliŋ na.

¹ Yaawe*, i hakiloo ye bula Dawuda la, aniŋ a ye bataa kuwolu mennu bee muña.

² I miira a ye laahidoo meŋ taa, aniŋ a kalita ite Sembetii Baa ye ñaameŋ, Yaakuba ka meŋ batu,

³ a ko, “N te duŋ na n na buŋo kono, sako n si n laa n na laaraŋo kaŋ,

⁴ n te m faŋ bula la ka siinoo, hani n ñaa, n te a biti la,

⁵ fo niŋ ŋa dulaa ñiniŋ Yaawe ye, sabatidulaa, Sembetii Baa ye, Yaakuba ka meŋ batu.”

⁶ A fele, ŋà Kambeŋ Kunewo* la kuwo moyi Efurata* le, aduŋ n naata a tara Yaari kunkoolu le to.

⁷ Bituŋ ǹ ko, “Ali ŋà taa Yaawe la sabatidulaa to. Ali ŋà sujudi a siŋo koto.”

⁸ Yaawe, wuli, i ye duŋ i la sabatidulaa to, i niŋ i la Kambeŋ Kunewo, meŋ mu i la semboo misaaloo ti.

⁹ Allamaa tiliŋo dendikamaa ye tara dundiŋ i la piriisoolu* la, aduŋ i la moo tilindiŋolu si wuuri seewoo kamma la.

¹⁰ I la laahidoo juubee Dawuda la kuwo kamma, i la dookuulaa, kana i bo i la mansa tombondiŋo to.

¹¹ Yaawe, i ye laahidi bambandiŋo le dii Dawuda la, i te meŋ baayi la. I ye ñiŋ ne fo a ye ko, “M be i diŋo le ke la i noo to mansa ti, meŋ be bo la i faŋo balajaatoo bala.

¹² Niŋ i diŋolu ye n na kambeŋo muta, aniŋ m be yaamaroolu mennu dii la ì la, ì diŋolu fanaa be sii la i noo to le, ka ke mansoolu ti fo abadaa.”

¹³ Baawo Yaawe ye Siyoni* le tomboŋ, a la lafoo mu ñiŋ ne ti, ka jee ke a yaa ti.

¹⁴ A ye ñiŋ ne fo ko, “M be sabati la jaŋ ne fo abadaa, m be tara la jaŋ ne, ŋa jaŋ ne lafi.

¹⁵ M be neema la Siyoni ma, a suulafeŋolu bee le to. M be konkoo bo la a la fuwaaroolu la le.

¹⁶ M be kiisoo dendikamaa le duŋ na a la piriisoolu la, aduŋ a la moo tilindiŋolu be tu la wuuroo niŋ seewoo le la.

¹⁷ “M be Dawuda koomalankoolu semboo lafaakuu la jee le. M be n na tomboŋ moo la mansayaa lampoo tu la malariŋ ne.

¹⁸ A jawoolu wo, m be maloo dendikamaa le tu la dundiŋ ì la. Bari ate la mansanaafoo be tu la malamala la a kuŋo to le.”