Jabuuroolu 13 - Mandinka Bible

Kiisoo duwaaraŋo

Meŋ be suukuulaa ñaatonkayaa la: Dawuda la Jabuuroo.

¹ Hee Yaawe*, janniŋ muŋ tuma? Fo i be ñina la nte la le fo fawu? Janniŋ muŋ tuma le i be i ñaa faa la nte ma?

² Janniŋ muŋ tuma le m be tu la muñariŋ niikuyaa kono, n jusoo ye tara faariŋ sunoo la suutoo niŋ tiloo? Janniŋ muŋ tuma le n jawoolu be tara la i kutu la n na?

³ Hee Yaawe n na Alla, i miira n na, i ye n jaabi. N ñaalu fanundi, niŋ wo nte m miŋ jiyo si dooyaa.

⁴ N jawoolu si taa a fo ko, “Ŋà a noo le.” Kana soŋ n konnantewolu ye jele n na kooroo la.

⁵ Nte ye n jikoo loo i la kanu bambaloo le kaŋ. M be jusulaa la le, kaatu i be n kiisa la le.

⁶ M be suukuwo laa la ite Yaawe ye le, kaatu i ye beteyaa doroŋ ne yitandi n na.