Jabuuroolu 125 - Mandinka Bible

Alla la moolu la tankoo

Moolu ka ñiŋ suukuwo le laa, niŋ ì be Alla Batudulaa Buŋo* waliŋ na.

¹ Moolu mennu ye ì jikoo loo Yaawe* kaŋ ka munta le ko, Siyoni* Konkoo meŋ te jiijaa noo la, a be tu la looriŋ ne fo abadaa.

² Komeŋ konkoolu ye Yerusalaamu murubeŋ ñaameŋ, Yaawe ye a la moolu murubeŋ wo le ñaama, ka bo saayiŋ na, ka taa fo abadaa.

³ Moo kuruŋolu te tu la maraloo ke la moo tilindiŋolu la bankoo kaŋ. Niŋ wo nte, moo tilindiŋolu si duŋ noo kuu jawu baaroo to le.

⁴ Yaawe, kuu kendoo ke moolu ye, mennu mu moo kendoolu ti, mennu ŋaniyoo seneyaata.

⁵ Bari moolu mennu ka taa ì fansuŋ sila jenkeriŋolu la, i si wolu niŋ moo kuruŋolu kasaara ñoo la. Kayiroo ye tara Banisirayila fee.