Jabuuroolu 124 - Mandinka Bible

Tenturoo Alla la tankandiroo kamma la

Moolu ka ñiŋ suukuwo le laa, niŋ ì be Alla Batudulaa Buŋo* waliŋ na. Dawuda la Jabuuroo.

¹ Niŋ Yaawe* maŋ tara nuŋ ntolu la karoo la, Banisirayilankoolu, ali a fo,

² niŋ Yaawe maŋ tara nuŋ ntolu la karoo la, kabiriŋ ǹ jawoolu ye m̀ boyinkaŋ,

³ ì kamfaariŋ baa, tennuŋ ì be ǹ kende kunuŋ na le.

⁴ Ì be ke la le komeŋ waamoo, ì ye ǹ kunuŋ. Ì be woyi la ǹ kaŋ ne komeŋ baa.

⁵ Ì be ǹ koora la le, ì ye ǹ samba, komeŋ jiibori saŋaroo.

⁶ Tentoo be Yaawe ye, ate le maŋ soŋ ì ye m̀ fara ì ñinkesoolu la.

⁷ Ǹ kanata le komeŋ niŋ kunoo bota deemalaa la kaliŋo daa. Kaliŋo kuntuta le, bituŋ ǹ kanata.

⁸ Maakoyiroo ka bo ǹ ye naŋ Yaawe le bulu, meŋ ye saŋo niŋ bankoo daa.