Jabuuroolu 121 - Mandinka Bible

Ka taamaayaa Alla la tankandiroo la

Moolu ka ñiŋ suukuwo le laa, niŋ ì be Alla Batudulaa Buŋo* waliŋ na.

¹ Ŋa n ñaalu wulindi ka konkoolu juubee. Maakoyiroo ka bo n ye naŋ mintoo le?

² Maakoyiroo ka bo n ye naŋ Yaawe* le bulu, meŋ ye saŋo niŋ bankoo daa.

³ A te soŋ na i siŋo ye bo i koto, i tankandilaa buka jinkoo.

⁴ Banisirayilankoolu tankandilaa buka jinkoo muumee, sako a si siinoo.

⁵ Yaawe le mu i tankandilaa ti. Ate le mu i ye dubeŋo ti, meŋ ka tara i fee.

⁶ Luŋ te soto la, tiloo si i mantoora meŋ na, sako karoo, suutoo la.

⁷ Yaawe be i tankandi la kuu jawoo bee ma le, a be i niyo kanta la le.

⁸ A be i tankandi la le, i duntoo niŋ i fintitoo, ka bo saayiŋ, ka taa fo abadaa.