Jabuuroolu 120 - Mandinka Bible

Alla la maakoyiroo duwaa

Moolu ka ñiŋ suukuwo le laa, niŋ ì be Alla Batudulaa Buŋo* waliŋ na.

¹ Kabiriŋ m be mantooroo kono, n kumboota Yaawe* ye, aduŋ a ye n jaabi le ka m maakoyi. Ŋa ñiŋ ne duwaa ko,

² “Yaawe, n tankandi faniyaa folaalu ma, aniŋ neeneerilaalu.”

³ Alitolu neeneerilaalu, ali la joo be ke la muŋ ne ti? Muŋ ne ñanta laa la ali kaŋ?

⁴ Kalabeñe meluŋo le be ali soo la, ali ye jani dimbaa wuleŋo kono.

⁵ Kooroo boyita n kaŋ ne, a ka munta le m be siiriŋ Meseki moolu le kono, waraŋ Kedari moolu.

⁶ M meebaata sabatiriŋ moolu kono le, mennu ye kayiroo koŋ.

⁷ Nte be kayiroo le fee, bari niŋ m be wo fo la, itolu ka tara keloo le fee.