Jabuuroolu 12 - Mandinka Bible

Tankandiri duwaaraŋo

Meŋ be suukuulaa ñaatonkayaa la: A si a ke niŋ kontiŋ julu seyoo la. Dawuda la Jabuuroo le mu.

¹ Hee Yaawe*, ǹ tankandi. Alla ñaasilannaa te keriŋ kotenke. Moo dankeneyaariŋolu bee le yeemanta hadamadiŋolu kono.

² Moolu bee ka faniyaa le fo ñoo ye. Ì ka ñoo yooti ì daalu le la, aduŋ neeneeroo le ka tara ì sondomoolu kono.

³ Allamaa Yaawe ye yootirilaalu deyindi, mennu ka kibiri kuma baalu fo ì neŋolu la,

⁴ mennu ka a fo ko, “Ǹ neŋolu le be a tinna la ŋà kututeyi. Ǹ daalu be m̀ bulu le, jumaa le si ntolu mara noo?”

⁵ Yaawe ko, “M be wuli la le, kaatu ì ye fuwaaroolu mantoora le, aduŋ fentaŋolu be woosii kaŋ ne. M be tankoo dii la ì la le, ì be lafiriŋ meŋ na.”

⁶ Yaawe la laahidi kumoolu maŋ sootaari soto, ì ka munta le ì ye kodiforoo meŋ seneyandi tunkaŋ dimbaa kono, a seneyaata ko siiñaa woorowula.

⁷ Hee Yaawe, ite le be ǹ kanta la, i ye ǹ tanka ñiŋ jamaanoo moo jawoolu ma waatoo bee la.

⁸ Ì ka tara ŋaañaa la karoo bee le la, bayiri moolu ka kuu jawoo le kidimandi.