Jabuuroolu 116 - Mandinka Bible

Tankoo saayaa ma

¹ Ŋa Yaawe* kanu le, kaatu a ye m moyi le, biriŋ n woosiita a ye ka a daani.

² Bayiri a ye a tuloo loo n na le, wo to luŋ-wo-luŋ m be kali a kumandi la le, niŋ m be n niyo la.

³ Saayaa jalamaa le naata n kaŋ karoo bee la, kaburoo silaŋo dunta n na, n tarata dewuŋo niŋ kijafaroo kono.

⁴ Bituŋ ŋa Yaawe too kumandi, ka a fo ko, “Hee Yaawe, ŋa i daani, n niyo tankandi.”

⁵ Yaawe hiinanteeyaata le, aduŋ a tilinta. Ǹ na Alla balafaa warata le.

⁶ Yaawe le ka moo tanka meŋ te a faŋ maakoyi noo la. Kabiriŋ m bataata, a ye n tankandi le.

⁷ Silaŋ n sondomoo si tenkuŋ, kaatu Yaawe ye beteyaa doroŋ ne yitandi n na.

⁸ Ite Yaawe le ye n niyo tanka saayaa ma, i ye n ñaa tanka ñaajii boŋo ma, i ye n siŋo tanka takoo ma.

⁹ Wo to m be tara la taama la ite Yaawe le fee baluwo kenoo to.

¹⁰ N kumata m faŋ ma ñaa-wo-ñaa ko, “Nte bataajawuta le,” bari n tuta dankeneyaariŋ ne.

¹¹ N na dewuŋo kaŋ n kumata ko, “Moolu bee le maŋ ke jikitaa ti.”

¹² Nte si muŋ ne ke noo Yaawe ye ñiŋ kamma la a beteyaata m fee ñaameŋ?

¹³ M be miŋ feŋ sadaa* le bo la ka Yaawe tentu a too la, a la n kiisoo kamma la.

¹⁴ M be n na laahidoolu timmandi la Yaawe ye le, a la moolu bee ñaa la.

¹⁵ Yaawe kanuntewolu kummaayaata a fee le, ì la saayaa buka ke a ye kuundiŋ ti.

¹⁶ Yaawe, nte mu i la dookuulaa musoo diŋo le ti, aduŋ m mu i la dookuulaa doroŋ ne ti. I ye m firiŋ ne, ka n tanka saayaa ma.

¹⁷ M be tenturulaŋ sadaa bo la i ye le, aduŋ m be duwaa la ite Yaawe too le la.

¹⁸ M be n na laahidoolu timmandi la Yaawe ye le, a la moolu bee ñaa la.

¹⁹ M be a ke la a batudulaa luwolu le to, Yerusalaamu saatewo kono. Ali Yaawe jayi.