Jabuuroolu 113 - Mandinka Bible

Alla le mu moo bataariŋolu maakoyilaa ti

¹ Ali Yaawe* jayi. Alitolu mennu mu Yaawe la dookuulaalu ti, ali a jayi. Ali a too jayi.

² Jayiroo ye ke Yaawe too la, ka bo saayiŋ, ka taa fo abadaa.

³ Ka bo tilibo, ka taa tilijii, Yaawe too ñanta le ka jayi.

⁴ Yaawe le be marariŋ duniyaa bankoolu bee ma, aduŋ a la kallankeeyaa* tambita saŋ fatoolu la le.

⁵ Jumaa le ka munta ko Yaawe, ntolu la Alla, meŋ be siiriŋ santo-santo?

⁶ Saŋ fatoolu niŋ bankoo be a ye duuma-duuma le, a ka jimi le ka juubeeroo ke,

⁷ aduŋ a ka fuwaaroolu sikandi le ka bo fentaŋyaa kono, a ye moo bataariŋolu bondi ì la ŋayiboo kono.

⁸ A ka ì niŋ maralilaalu le kafuñooyandi, mennu mu a la moolu la ñaatonkoolu ti.

⁹ Ate le ka a tinna musu jiidibaloo ye horomoo soto suwo kono, a ka diŋolu dii a la le, a ye a seewondi. Ali Yaawe jayi.