Jabuuroolu 112 - Mandinka Bible

Moo tilindiŋo la kuwo neemoo

¹ Ali Yaawe* jayi. Barakoo be moo le ye meŋ ye Yaawe ñaasilaŋo soto, meŋ ka seewoo baake a la yaamaroolu mutoo la.

² Moo kendoo diŋolu be ke la sembetiyolu le ti bankoo kaŋ, Alla be neema la a koomalankoolu ma le.

³ Fankoo niŋ naafuloo be tara la a la dimbaayaalu ye le, aduŋ a la tiliŋo te ke la ñina kuu ti fo abadaa.

⁴ Hani diboo kono maloo ka ke moo kendoo ye le, moo meŋ balafaa warata, a konotoo diyaata, aduŋ a tilinta.

⁵ Neemoo be moo ye le meŋ ka niiroo ke baake, a ka moolu donto, aduŋ a ka a la kuwolu bee taamandi niŋ tiliŋo la.

⁶ Moo tilindiŋo te wutu la a noo to. Moolu te ñina la a la fo fawu.

⁷ A buka sila niŋ a ye kibaari jawoo moyi. A jusoo ka beŋ ne, aduŋ a ka a jikoo loo Yaawe le kaŋ.

⁸ A sondomoo ka tenkuŋ ne, aduŋ a buka sila, fo luŋo meŋ na a be a jawoolu la boyoo je la.

⁹ A ka niiroo ke baake le, ka a dii fentaŋolu la. A la tiliŋo te ke la ñina kuu ti fo abadaa. A semboo be wara la le, aduŋ moolu be a horoma la le.

¹⁰ Moo kuruŋolu si wo je, ì ye kamfaa. Ì si i ñimmakiŋ, aduŋ ì niŋ wo le ka faa. Moo kuruŋo hame kuwo ka naa ke kuu kenseŋo le ti.