Jabuuroolu 11 - Mandinka Bible

Dankeneyaa suukuwo

Meŋ be suukuulaa ñaatonkayaa la: Dawuda la Jabuuroo le mu.

¹ M bambuta Yaawe* le kooma, wo to, muŋ ne ye a tinna ali ko n ye ko, “Tii ko kunoo, i ye taa konkoolu to.

² Kaatu a fele, moo kuruŋolu ye ì la kalandiŋolu ŋaaji le ka juloo ke ì la. Ì ye ì la kalabeñoolu ke kalandiŋ juloo daa, ka moo betoolu buŋ diboo kono.

³ Moo tilindiŋolu te kuu ke noo la, niŋ luwaa burukata.”

⁴ Yaawe be a taradulaa senuŋo to le, a ka a la mansabaayaa taamandi le ka bo Arijana kono, a ñaa be kuwo bee le la, aduŋ a ka hadamadiŋolu bee le koroosi.

⁵ Yaawe ka moo tilindiŋolu niŋ moo kuruŋolu bee le kotobo. A ye fitinantuŋolu koŋ jawuke le.

⁶ A be dimbaa keñembu wuleŋo niŋ solifa* dimbaa le jindi la moo kuruŋolu kaŋ, komeŋ samaajiyo. A be ì jarabi la foño kandi jawu baa le la.

⁷ Yaawe tilinta le, aduŋ a ye kuu tilindiŋo le kanu. Moo tilindiŋolu le be tara la ate fee.