Jabuuroolu 109 - Mandinka Bible

Jawoolu kiitindoo niŋ ì la jaraboo duwaa

Meŋ be suukuulaa ñaatonkayaa la: Dawuda la Jabuuroo.

¹ Hee Alla, n ka ite meŋ jayi, kana tu deyiriŋ.

² Kaatu moo kuruŋolu le ye ì daalu tiliŋ n na, aniŋ faniyaa folaalu, ka faniyaa kumoolu fo m ma.

³ Ì ka n kuru niŋ konnanteeyaa kumoolu le la, aniŋ ka m boyinkaŋ, daliila te a la.

⁴ N na ì kanoo ñaa-wo-ñaa, ì ka n tuumi le, bari nte de, fo n ka duwaa meŋ ke ì ye.

⁵ Ì ka n na kuu kendoo joo kuu jawoo le la, aniŋ ka n na kanoo joo konnanteeyaa la.

⁶ Moo tilimbaloo wulindi n jawoo kamma kiitiyo la, i ye tuumirilaa jawoo londi a kamma.

⁷ Allamaa niŋ ì ye a kiitindi, a ye boyi. Allamaa a la duwaa ye ke a ye junuboo ti.

⁸ Allamaa a baluu tiloolu ye dooyaa, moo doo ye a la dookuu palaasoo taa.

⁹ Allamaa a diŋolu ye ke aliyatiimoolu ti, a la musoo ye ke furuyaamusoo ti.

¹⁰ Allamaa a diŋolu ye yaayi ka sadaa daani. Allamaa ì ye ì bayi ka bo ì la suu tumbundiŋolu to.

¹¹ Allamaa kanindirilaa ye a la sotofeŋolu bee taa. Allamaa a ye meŋ bee dookuu, luntaŋolu ye a ñapinkaŋ.

¹² Allamaa moo kana konotodiyaa yitandi a la, sako ka balafaa a diŋolu ye, a ye mennu tu.

¹³ Allamaa a koomoo ye buruka fereŋ. Allamaa a too kana tu jamaani naalaa kono.

¹⁴ Allamaa Yaawe* ye a la alifaa foloolu la junuboo muta a kono, aduŋ a baamaa la junuboo kana tuutuu.

¹⁵ Allamaa Yaawe ye ì tu mutariŋ a kono, moo hakili kana bula itolu la fereŋ.

¹⁶ Bayiri ate maŋ i miira ka konotodiyaa yitandi, a ka fuwaaroolu le toorandi, sembentaŋolu, aniŋ moo jikilateyiriŋolu, ka ì faa.

¹⁷ A ye ñiŋ ne kanu ka dankaroo ke, Allamaa a danka la. A buka lafi ka neemoo ŋaniya, Allamaa a jamfa la a la.

¹⁸ A ye dankaroo le ke a la dendikoo ti, Allamaa a ye duŋ a baloo la komeŋ jiyo, a ye duŋ a kuloolu kono komeŋ tuloo.

¹⁹ Allamaa a ye ke a bala ko a la duŋ feŋo, a ye tu minindiŋ a la ko a la teesitiraŋo.

²⁰ Allamaa wo ye ke n tuumilaalu la joo ti ka bo Yaawe bulu, wolu mennu ka kuma jawoolu fo m ma.

²¹ Bari ite Yaawe, m Maariyo si loo n na kuwo la, i too kamma la. I la kanu bambaloo niŋ i la beteyaa kaŋ, n tankandi.

²² Nte mu fuwaaroo le ti, aniŋ sembentaŋo, aduŋ m be toorariŋ n sondomoo kono le.

²³ M be yeemaŋ kaŋ ne ko wulaara niiniyo. N ka munta le ko kuntiŋo, ì ka meŋ konkoŋ a ye joloŋ.

²⁴ N kumbaliŋolu korita le suŋo kamma la. M baloo bee borita fo n jaata kos.

²⁵ N keta n tuumilaalu ye jelefeŋo le ti. Niŋ ì ye n je, ì ka ì kuŋolu le jiijaa ka n ñaawali.

²⁶ Hee Yaawe n na Alla, m maakoyi, i ye n kiisa i la kanu bambaloo kaŋ.

²⁷ Ì kalamutandi ñiŋ na ko, ite le ye a ke, ite Yaawe le ka n kiisa.

²⁸ Ì ye n danka ñaa-wo-ñaa, ite si neema m ma. Niŋ ì ye m boyinkaŋ, ì si bula maloo kono, aduŋ nte, i la dookuulaa, si seewoo.

²⁹ Allamaa jutunnayaa ye feenee n tuumilaalu kaŋ. Allamaa ì faŋolu la maloo ye ke ì bala ko dendikoo.

³⁰ M be tenturoo dii la Yaawe la baake le. M be a jayi la jamaa teema le,

³¹ kaatu a ka loo sembentaŋolu la kuwo la le, ka ì kiisa kiitiikuntulaa jenkeriŋolu bulu mennu ka ì faa.