Jabuuroolu 108 - Mandinka Bible

Maakoyiroo duwaa

Dawuda la Jabuura suukuwo le mu.

¹ Hee Alla, n sondomoo ye i la kuwo muta le, a bambanta. M be suukuwo laa la le ka i jayi, m be a ke la niŋ n niyo bee le la.

² Ŋa n na kontiŋo niŋ kooraa sika le ka bo laariŋ. M be fanoo la kewo kontoŋ na niŋ suukuwo le la.

³ Yaawe*, m be i tentu la moolu bee le kono. M be suukuwo laa la i ye le ka i jayi duniyaa siyolu kono,

⁴ kaatu i la kanu bambaloo la waroo tambita saŋ fatoolu la le, i la foroyaa futata minaayoolu ma le.

⁵ Kooni Alla, i la horomoo faramansandi saŋ fatoolu kaŋ, i ye duniyaa bee fandi i la semboo niŋ waroo la.

⁶ Ǹ na duwaa jaabi, ǹ kiisa i ye ǹ deemaa ka bo niŋ i bulubaa buloo la, ñiŋ kamma la i la kanu moolu si tanka.

⁷ Alla ye ñiŋ ne laahidi a la seneyaa kaŋ ko: “N na nooroo kaŋ, ka bo tilibo la, m be Sekemu saatewo talaŋ-talaŋ na le, ka bo tilijii la, ŋa Sukoti Wulumbaŋo niilaa.

⁸ Kileyadi tundoo mu n taa le ti, Manase fanaa mu n taa le ti, N na kelejawaroolu be bo la Efurayimu* le kono, n na mansoolu ye bo Yahuuda kono.

⁹ Mowabi, wo mu n na bulu kuuraŋ miraŋo le ti. N ka n na samatoo wura Edomu bankoo le kaŋ ka n tooyaa yitandi a kunna. N ka wuuroo kumandi Filisitinkoolu ma le, n na ì noo kaŋ.”

¹⁰ Jumaa le be n samba la saatee tatariŋo to? Jumaa le be tambi la n ñaato Edomu kamma?

¹¹ Hee Alla, i ye i bo ǹ to le baŋ? Fo i te tara la ǹ na kelediŋolu fee keloo to kotenke?

¹² Dukaree, m̀ maakoyi ǹ jawoolu to, kaatu hadamadiŋo la maakoyiroo mu kenseŋ ne ti.

¹³ Niŋ ite Alla be m̀ fee, m̀ be nooroo ke la le. Ite le be ǹ jawoolu dori la duuma.