Jabuuroolu 107 - Mandinka Bible

Talaadaa 5 Jabuuroolu 107—150 Tenturu Suukuwo

¹ Ali Yaawe* tentu kaatu a beteyaata le, a la kanu bambaloo be tu la le fo abadaa.

² Yaawe ye mennu kiisa, ì ñanta ka wo le fo, a ye mennu kiisa ka bo ì jawoolu bulu.

³ A ye doolu murundi naŋ ka bo wandi bankoolu kaŋ, ka bo tilibo niŋ tilijii, aniŋ bulubaa niŋ maraa karoo la.

⁴ Doolu yaayita keñewula* kenseŋo kono, ì maŋ sabatidulaa soto jee.

⁵ Konkoo niŋ mindoo ye ì muta, fo ì jikilateyita.

⁶ Bituŋ ì la mantooroo kono, ì kumboota Yaawe ye, aduŋ a ye ì bondi ì la tooroo kono le.

⁷ A ye ì samba niŋ sila tilindiŋo la, ka taa saatewo to ì be sii la daameŋ.

⁸ Ì ñanta Yaawe tentu la a la kanu bambaloo kaŋ ne, a ye kaawakuu baalu mennu ke hadamadiŋolu ye.

⁹ A ye moolu wasa le mennu mindoota, aduŋ a ye domori kendoo dii moolu la le mennu konkota.

¹⁰ Doolu tarata baluuriŋ dibi fiŋ baa niŋ niitoora koleŋo le kono, ì tarata sitiriŋ tooroo kono joloolu daa.

¹¹ Kaatu ì balanta Alla la kumoolu la le, ka jutu Mansa Tallaa la yaamaroolu la.

¹² Bataa koleŋo ye ì kijoo teyi le, ì ka busandi, aduŋ moo buka ì maakoyi.

¹³ Bituŋ ì la mantooroo kono, ì kumboota Yaawe ye, aduŋ a ye ì bondi ì la tooroo kono le.

¹⁴ A ye ì bondi dibi fiŋ baa niŋ niitooroo kono, a ye ì la joŋyaa joloolu kuntu ì la.

¹⁵ Ì ñanta Yaawe tentu la a la kanu bambaloo kaŋ ne, a ye kaawakuu baalu mennu ke hadamadiŋolu ye.

¹⁶ Kaatu a ye jaawali daa tawundaŋolu janjaŋ ne, a ye nee bantambiloolu katiŋ-katiŋ.

¹⁷ Doolu tooleeyaata ì la balambaatooyaa kaŋ ne, aduŋ ì la kuu jawoolu kamma la, mantoora baa laata ì kaŋ.

¹⁸ Ì ka ñewuŋ domoroo faŋo la le, aduŋ ì tarata saayaa le daa to.

¹⁹ Bituŋ ì la mantooroo kono, ì kumboota Yaawe ye, aduŋ a ye ì bondi ì la tooroo kono le.

²⁰ A ye a la kumoo le kii, aduŋ a ye ì kendeyandi le, ka ì tanka kaburoo ma.

²¹ Ì ñanta Yaawe tentu la a la kanu bambaloo kaŋ ne, a ye kaawakuu baalu mennu ke hadamadiŋolu ye.

²² Ì ñanta tenturulaŋ sadaalu* bondi la a ye le, aniŋ ka suukuwolu laa niŋ seewoo la, ka a fo a ye kuwolu mennu ke.

²³ Doolu be ì kono wolu ye fankaasoo teyi kuluŋolu la, ì ka safaaroo ke wo le ñaama.

²⁴ Wolu ye Yaawe la semboo je le, a ye kaawakuwolu mennu ke diinoŋñaa to.

²⁵ Kabiriŋ a kumata, turubaadoo wulita, a feeta, a ye fankaasoo jiibaliŋolu wulindi.

²⁶ Kuluŋo wulita ì ti santo, a tinsamuta ì fee diinoŋñaa to. Ñiŋ kasaara jawoo waatoo la, ì kijoo teyita le.

²⁷ Ì takita le ka siirisaara ko dolomintoolu, aduŋ ì feeroo banta.

²⁸ Bituŋ ì la mantooroo kono, ì kumboota Yaawe ye, aduŋ a ye ì bondi ì la tooroo kono.

²⁹ A ye turubaadoo londi le, fankaasoo jiibaliŋolu tenkunta.

³⁰ Bituŋ ì seewoota jiibaliŋolu la tenkuŋo la, aduŋ a ye ì samba ì sembe dulaa to.

³¹ Ì ñanta Yaawe tentu la a la kanu bambaloo kaŋ ne, a ye kaawakuu baalu mennu ke hadamadiŋolu ye.

³² Ì ñanta le ka a la kuwo kidimandi niŋ jamaa benta, aniŋ ka a jayi ì la alifaalu la beŋo to.

³³ Yaawe le ka baalu jandi, a ye woyoolu muta, ì te woyi la, fo bankoo ye jaa kawu, a ye ke ko keñewuloo.

³⁴ A ka senebanku kendoolu yelemandi lewolu ti le, jee siilaalu la jawuyaa maañaa kamma la.

³⁵ A ka keñewuloolu yelemandi daloolu ti le, aniŋ ka banku jaaroo yelemandi woyoolu ti.

³⁶ A ka moo konkoriŋolu sindi wo dulaalu to le, ì ye saatewolu loo ka sii ì kono.

³⁷ Ì ka kunkoolu fii le, ì ye wayini* yiri kankaŋolu tutu, aduŋ ì ka tinee baa le soto.

³⁸ A ka neema a la moolu ma le, ì ye jiidi kendeke, aduŋ a buka ì la beeyaŋolu yirikoo talaa.

³⁹ Niŋ a la moolu la kuwo jiita, ì bulata dooyaa kono, ka bo ì jawoolu la tilimbaliyaa niŋ mantoora koleŋo la,

⁴⁰ a ka ì noolaa kandaalu malundi le, a ye ì yaayindi keñewuloo kono, sila te daameŋ.

⁴¹ Bari a ka fentaŋolu sikandi le, ka bo tooroo kono, a ye ì la dimbaayaalu yiriwandi komeŋ koorewo.

⁴² Moo tilindiŋolu le ka ñiŋ kuwo kalamuta, ì ye seewoo, aduŋ moo jawoolu buka fotaa soto.

⁴³ Moo-wo-moo ñaamenta, a si a hakiloo tu ñiŋ kuwolu to, ka i miira Yaawe la kanu bambaloo la.