Jabuuroolu 105 - Mandinka Bible

Alla la tomboŋ moolu la taarika suukuwo

¹ Ali tenturoo dii Yaawe* la. Ali ye a batu a too la. Ali a fo bantala banku* moolu ye a ye kuwolu mennu ke.

² Ali suukuwo laa a ye ka a jayi, ali a fo, a ye kaawakuwolu mennu ke.

³ Ali kidimandiroo ke a too senuŋo la. Moolu mennu ka Yaawe ñini, ì ye jusulaa.

⁴ Ali ñinindiri ke Yaawe la, aniŋ a la semboo, ali a ñini ka tara a ñaatiliŋo la waati-wo-waati.

^5-6 Alitolu Iburayima koomalankoolu, Alla la dookuulaa, Yaakuba koomalankoolu, Yaawe ye mennu tomboŋ, ali i miira kuu baalu la, a ye mennu ke, aniŋ a ye kaawakuwolu niŋ kiitiiteyoolu mennu taamandi.

⁷ Ate Yaawe le mu ǹ na Alla ti, a la kiitiiteyoo le ka taama duniyaa bee kono.

⁸ A ka tu a la kambeŋo mutariŋ ne fo abadaa. A ka a la laahidoolu muta le hani fo jamaani wuliwuloolu la.

⁹ A ye kambeŋo meŋ siti a niŋ Iburayima teema, a kalita wo laahidoo la Isiyaaka le ye.

¹⁰ A ye a londi luwaa le ti, ka wo laahidoo bambandi Yaakuba ma, kambeŋo meŋ laahidoo be tu la a niŋ Isirayila teema fo abadaa.

¹¹ A ko, “M be Kanaani bankoo dii la i la le, a ye ke i koomalankoolu la keetaafeŋo ti.”

¹² Tuma meŋ ì yaatewo be dooyaariŋ, ì moo dantaŋ doroŋ ne mu, aduŋ tumarankewolu le mu ì ti nuŋ Kanaani bankoo kaŋ.

¹³ Ì tarata yaayi la le ka bo banku ka taa banku, ka bo mansamarali banku ka taa doo to.

¹⁴ Alla maŋ moo kiliŋ bula ka ì mantoora. A ye mansoolu dandalaa ì la kuwo la le.

¹⁵ A ko, “Ali kana n na tomboŋ moolu maa, sako ka kuu ke n na annabiyomoolu la.”

¹⁶ A ye konkoo le boyi Kanaani bankoo kaŋ, a ye ì la siimaŋ sotoo daŋ.

¹⁷ Bari a ye kewo doo le kii ì ñaato Misira bankoo kaŋ, meŋ keta Yusufa ti, ì ye meŋ waafi ka ke joŋo ti.

¹⁸ Ì ye a siŋolu siti joloo la, ì ye newo soroŋ a kaŋo daa ka a dundi bunjawoo kono.

¹⁹ Ì ye a tu sitiriŋ ne, fo Alla ye i bandi Yusufa kotobo la, aduŋ a ye Yusufa la ñaatokumafoolu ke tooñaa ti.

²⁰ Misira mansa le ye kaŋo dii ka a bula, jamaa moolu bee la wo maralilaa le ye a firiŋ.

²¹ A ye Yusufa le marandi a la mansabuŋo ma, aduŋ a ye a ke maralilaa ti a la marafeŋolu bee kunna.

²² A ka mansa la ñaatonkoolu ñaalabulandi le, a diyaata a ye ñaameŋ, aniŋ ka a la yaamarilaalu ñaamendi.

²³ Isirayila naañaa keta wo le ti Misira bankoo kaŋ, Yaakuba bajonkita wo bankoo kaŋ teŋ ne.

²⁴ Bituŋ Yaawe naata a la moolu jiidindi, a ye semboo dii ì la ka tambi ì jawoolu la, Misirankoolu.

²⁵ A ye Misirankoolu sondomoolu kiiliyandi le ka a la moolu koŋ, a la dookuulaalu, ka jamfaa taamandi ì kaŋ.

²⁶ Bituŋ Yaawe ye a la dookuulaa Musa kii Misira, a niŋ Haaruna, a ye meŋ tomboŋ.

²⁷ Ì ye a la taamanseeroolu taamandi Misira bankoo kaŋ, aduŋ ì ye kaawakuwolu ke jee le.

²⁸ Alla ye diboo dundi bankoo kaŋ, dibi fiŋ diboo, Misirankoolu balanta a la yaamaroolu la.

²⁹ A ye ì la baajiyo yelemandi yeloo ti, ka ì la ñewolu bee faa.

³⁰ Totoolu ye ì la bankoo bee beŋ, hani ì la mansabuŋolu kono.

³¹ Alla ye yaamaroo dii, sii koorewolu naata, aniŋ suusuulaalu, bankoo bee kaŋ.

³² A ye samaajiyo ke ì ye samberoo ti, saŋ ŋalasoo tuta ŋalasi la ì la bankoo bee kaŋ.

³³ A ye ì la wayini* yiroolu niŋ sootoolu bee kasaara le, a ye bankoo yiroolu bee faraŋ-faraŋ.

³⁴ A kumata kotenke, kuntiŋolu naata, kuntiŋolu mennu maŋ yaatee soto.

³⁵ Ì ye fiifeŋolu bee le ñimi bankoo kaŋ, ì ye ì la siimaŋolu bee domo.

³⁶ A ye konoñaa foloolu bee le faa ì la bankoo kaŋ, ì ye mennu wuluu biriŋ ì be ì la fondinkeeyaa daa to.

³⁷ Bituŋ a ye Banisirayilankoolu fintindi, ì niŋ sanoo niŋ kodiforo ñaroolu, aduŋ kiliŋ te ì lasiloolu kono meŋ jaatoo korita.

³⁸ Misirankoolu seewoota le kabiriŋ ì taata, kaatu ì silata Banisirayilankoolu la le.

³⁹ Alla ye minaayoo le wanka ì kunto, suutoo a ka dimbaa le bondi ka maloo dii ì la.

⁴⁰ Ì ye kanindiroo ke, a ye woloolu dii ì la, a ye mbuuroo jindi ì ye naŋ Arijana kono, ka ì konoolu fandi.

⁴¹ A ye beroo fara, jiyo woyita, a borita keñewuloo* kono komeŋ baa.

⁴² A maŋ ñina a la laahidi senuŋo la, a ye meŋ dii a la dookuulaa Iburayima la.

⁴³ A ye a la tomboŋ moolu bondi teŋ ne, ì niŋ seewoo niŋ suukuwo.

⁴⁴ A ye moo koteŋolu la bankoolu dii ì la, a ye ì la doofeŋolu ke ì taa ti,

⁴⁵ ñiŋ kamma la ì si a la luwaalu muta, aniŋ ka taama a la yaamaroolu la. Ali Yaawe jayi.