Jabuuroolu 101 - Mandinka Bible

Mansa la konotoseneyaa

Dawuda la Jabuuroo.

¹ M be kanu bambaloo niŋ tooñaa taamandoo le suukuu la. Yaawe*, m be a laa la ite le ye.

² M be n hakilitu la le n kana sootaari soto n kekuwolu to. Muŋ tuma le i be naa nte kaŋ ka n karandi? M be taama la konotoseneyaa le la n na maralibuŋo kono.

³ N te soŋ na n ñaa ye tara kuu jawu kewo kaŋ. Ŋa moo badaliriŋolu kekuwolu koŋ ne, n te soŋ na wo la muk.

⁴ Allamaa ŋaniya jawuyaa jamfa la n na. N te m faŋ duŋ na kuu jawu kewo to muk.

⁵ Moo meŋ ka a ñoŋ moo too kullootoo tiñaa, m be wo kasaara la le. N niŋ kufannaa niŋ faŋ waralaa te sii noo la.

⁶ M be konotodiyaa le yitandi la lannamoolu la, bankoo kaŋ, aduŋ n si ì bula ì ye sabati m fee. Moo-wo-moo ka a hakilitu a faŋ to, fo a kana sootaaroo soto a kekuwolu to, wo si dookuwo ke noo n ye le.

⁷ Neeneerilaalu te sii la n na maralibuŋo kono, aduŋ faniyaa folaalu te sabati la m fee.

⁸ Luŋ-wo-luŋ m be kali kuu jawu kelaalu buruka la bankoo kaŋ ne. M be moo jawoolu bee bayi la le ka bo Yaawe la saatewo kono.