Jabuuroolu 10 - Mandinka Bible

Moo toorariŋo la tankoo duwaa

¹ Hee Yaawe*, muŋ ne ye a tinna i jamfata ntolu la? Muŋ ne ye a tinna i maabota m̀ ma, waatoo meŋ m̀ be mantooroo kono?

² Moo kuruŋo ka a faŋ wara le, ka fentaŋolu toorandi. A ye feere jawoolu mennu dadaa, ì si a faŋo muta.

³ Moo kuruŋo ka kibiri a lafinna kuwolu kaŋ ne. A ka a ñoŋ moo hadumeriŋo jayi le, a ka Yaawe sooki.

⁴ A la faŋ waroo le ka a tinna a ka a fo ko, “Alla te kuu kisikisi la.” A ka tu ñiŋ ne miira la a faŋ ma ko, “Alla te keriŋ.”

⁵ A ka firiŋo soto a baluuñaa bee le to, a la jeroo buka futa Alla la kiitiyo ma. A ka a jawoolu bee ñaawali le.

⁶ A ka ñiŋ ne fo a faŋ ma ko, “N te bo la n noo to muk. N te bula la mantooroo kono abadaa.”

⁷ A daa kono ka tara faariŋ dankaroo le la, neeneeroo, aniŋ mantoora kumoo. A neŋo be kalandiŋ kuruŋyaa niŋ kuu jawoo le la.

⁸ A ka deleŋo laa moolu kamma saateeriŋolu to, ka moolu faa, maakoyilaa te mennu la. A ka tu a ñaa loo la moolu le la, mennu te ì faŋ maakoyi noo la.

⁹ A jatamaa le ka tara bitiriŋ a la maabodulaa, a ka tara bitiriŋ ne ka boyi moo bataariŋolu kaŋ. A ka ì muta a la jaloolu le la, a ye ì kuruntu ka ì samba.

¹⁰ Moolu mennu te ì faŋ maakoyi noo la si busandi, ì ye kasaara. A ka ì boyindi a semboo le la.

¹¹ A ka ñiŋ ne fo a faŋ ma ko, “Alla daa te n na kuu to. A ye a ñaa kaasi n na le. A nene te n je la.”

¹² Hee Yaawe Alla, wuli, i buloo ye laa moo kuruŋolu kaŋ. Kana ñina moo toorariŋolu la.

¹³ Muŋ ne ka moo kuruŋo jutundi Alla la, fo a ka a fo a faŋ ma ko, “Alla te n kontibo la”?

¹⁴ Bari ite Alla ka jeroo ke le de, ka moo bataariŋolu la kuwo hakilitu, aniŋ niitoorariŋolu, ñiŋ kamma la i si i buloo duŋ ì la kuwo to ka ì maakoyi. Moolu mennu te ì faŋ maakoyi noo la ka ì faŋolu karafa ite le ma. Ite le mu aliyatiimoolu maakoyilaa ti.

¹⁵ Moo kuruŋolu niŋ moo jawoolu semboo tiñaa. Ì jarabi ì la kuu kuruŋolu la fo a bee ye baŋ ì bala.

¹⁶ Yaawe le mu Mansoo ti fo fawu. Bantala banku* moolu be turutumbuŋ na a la bankoo kaŋ ne.

¹⁷ Hee Yaawe, ite be i lamoyi la fammajiilaalu la duwaa la le, ka ì la duwaa jaabi. I be ì sondomoo bambandi la le.

¹⁸ I be aliyatiimoolu danku la le, aniŋ moo toorariŋolu, ka kiitiyo teyi ì ye. Wo to le moo te tara la duniyaa meŋ si moo doolu silandi.