Hoseya 7 - Mandinka Bible

¹ Waati-wo-waati niŋ n ko, m be n na moolu murundi la ì la firiŋo kono, niŋ n ko, m be n na moolu jaara la waatoo meŋ na, Efurayimu* la junube baaroo si laa kenoo to, aniŋ Samariya la kuu kuruŋolu. Ì ka moolu nakari, suŋolu ka buŋolu teyi, bandiyolu ka ñapi moolu kaŋ mbeedoolu kaŋ.

² Bari ì maŋ ñiŋ miira ko, n hakiloo be tara la ì la tilimbaliyaa bee kaŋ ne, ì kebaaroolu ye ì murubeŋ ne, ì be n ñaatiliŋo le la.”

Jamfaa mansabuŋo kono

³ Yaawe* ko: “Ì la kuu kuruŋ kewo, ì ka mansa kontaanindi wo le la, maralilaalu, ì la neeneeroo la.

⁴ Ì bee mu foroyaabaloolu le ti, ì jusoo be kandiriŋ ne ko fuuri kandoo, fuuroo meŋ kandita, fo a maŋ jari mbuuru janilaa ye a dimbaa ñori, ka bo nooniri waatoo ka taa fo janniŋ a be sele la.

⁵ Ì la mansa la juurali luŋo la, wayinoo* ye maralilaalu siira. Mansa niŋ ñaawalilaalu keta kiliŋ ti.

⁶ Ì niŋ jamfaa le ka mansa waliŋ, ì jusoo be kandiriŋ ko fuuroo, suutoo bee, ì la kamfaa ka jii le, bari wo ñaa-wo-ñaa, fanoo la kewo, a ka mala le ko dimbaa.

⁷ Ì bee jusoo be kandiriŋ ne ko fuuroo, ì ka ì la maralilaalu faa le. Ì ka ì la mansoolu kiliŋ-kiliŋ faa, bari hani wo, ñiŋ moolu kiliŋ maŋ junube kafaroo daani m bulu.”

Banisirayila be jikiriŋ banku koteŋolu le la

⁸ Yaawe ko, “Efurayimu niŋ banku koteŋolu ka ñaami, a keta le ko mbuuru dampatandiŋo, meŋ maŋ yelemandi a jani waatoo la.

⁹ Naalaalu ye a semboo suusuu, bari a maŋ a loŋ. A kuŋo ye a dati ka koyi, a maŋ a kalamuta.

¹⁰ Banisirayila la faŋ waroo le keta a faŋo seedoo ti. A be bataa kono ñaa-wo-ñaa, a maŋ muru Yaawe kaŋ, a la Alla, sako ka a la maakoyiroo ñini.

¹¹ “Efurayimu be le ko puraa, a neenewo feeyaata, hakili te a la, a be Misira le kili kaŋ deemaaroo la, saayiŋ a fele, a yelemata Asiriya.

¹² Ì la ñiŋ taa niŋ naa kono, m be n na jaloo fayi la ì kaŋ ne, ŋa ì jindi naŋ ko kunoo. Ŋa ì jarabi, ko a kankulaata ì la bendulaa to ñaameŋ.

¹³ “Kooroo be ì ye, kaatu ì borita n na le. Kasaaroo be ì ye, kaatu ì balanta m ma le. M be hameriŋ ka ì kumakaa, bari ì ka faniyaa fo m ma.

¹⁴ Ì buka woosii nte ye ì sondomoo bee la, bari ì ka tara sikisiki kaŋ ì la laaraŋolu kaŋ. Niŋ ì be siimaŋo niŋ wayinoo daani kaŋ, ì ka ì balajaatoolu namaŋ-namaŋ ko jalambatulaalu. Ì balanta nte ma.

¹⁵ “Nte le ye ì kuluu, ŋa ì bambandi, bari ì ka kuu kuruŋo le feere n kamma.

¹⁶ Ì maŋ muru nte Alla Tallaa kaŋ, ì ka muluŋ ne ko kala jenkeriŋo. Hawusaroo* le be ì la maralilaalu faa la, ì daakumoo la jawuyaa kamma. Ñiŋ be ì ke la jelefeŋo le ti Misira.”