Hoseya 6 - Mandinka Bible

Yaawe la moolu diyaamuta

¹ Moolu ko, “Ali naa, ŋà muru Yaawe* kaŋ, ate le ye ǹ dimindi, a be ǹ jaara la le. Ate le ye m̀ barama, a be ǹ kendeyandi la le.

² Tili fula ñaato, a be m̀ murundi la ǹ ñaama le. Tili sabanjaŋo, a be ǹ wulindi la le, ŋà loo, fo ǹ si baluu a ñaatiliŋo la.

³ Saayiŋ, ali ŋà ǹ na katoo daŋo bee ke, ka Yaawe loŋ, ka a la kuwo fahaamu. A be naa ǹ kaŋ ne, wo be koyiriŋ ne ko perekaanoo, a be naa la ǹ kaŋ ne ko, samaajiyo ka bankoo jiiboŋ ñaameŋ, samaa foloo niŋ samaa labaŋ jiyo.”

Yaawe diyaamuta Banisirayila niŋ Yahuuda ye

⁴ Bari Yaawe ko: “Ite Efurayimu*, m be i la kuwo laa la ñaadii le? Ite Yahuuda, m be i ke la ñaadii le? Ali la kanoo ka yeemaŋ ne ko tuutuwo, a ka yeemaŋ ne waati kiliŋ ko komboo.

⁵ Wo le ye a tinna ŋa n na annabiyomoolu kii naŋ ali kaŋ, ka kiitiyo niŋ yankankatoo bankee ali ye. N na kiitiyo fintita le ko tiloo.

⁶ N lafita kanu bambaloo le la, a maŋ ke beeyaŋ sadaa* ti, Alla loŋo diina jani sadaa ti.

⁷ “Ko a keta nuŋ ñaameŋ Adama saatewo maafaŋo la, Banisirayila ye kambeŋo tiñaa, n niŋ ì ye meŋ siti. Ì ye foroyaabaliyaa tiliŋ n na jee.

⁸ Kileyadi mu kuu kuruŋ kelaalu la saatewo le ti, yeleboŋo ye a kosondi.

⁹ Ko suŋolu ka biti moolu kamma ñaameŋ, piriisoolu* ka kumbeŋ ñoo kaŋ wo le ñaama. Ì ka faaroo ke le hani Sekemu siloo kaŋ, ì la ñiŋ kuu kuruŋolu mu malu kuu baa le ti.

¹⁰ Banisirayila kono, ŋa kuu ñewundiŋo le je jee. Efurayimu be cakayaa le kaŋ, Banisirayila kosota.

¹¹ “Ite Yahuuda, i fanaa jarabi waatoo be siloo kaŋ ne.