Esekiyeli 28 - Mandinka Bible

Kiilaariyaa kumoo Tire maralilaa ye

¹ Yaawe* la kumoo naata n kaŋ ko:

² “Hadamadiŋo, a fo Tire maralilaa ye, Maarii Yaawe ye ñiŋ ne fo a la kuwo to ko: I ye sondome waroo le soto, i ka tintiŋ meŋ na, i ka a fo le ko, ite mu alla le ti. I ko, i be siiriŋ alloolu la siiraŋo le kaŋ, baa teema. Bari i maŋ ke alla ti, hadamadiŋo doroŋ ne mu i ti, hani niŋ a ye a tara ite ye a miira ko, i ñaamenta le ko alla.

³ Hani ite le ñaamenta Daniyeli ti, kulloo te jee meŋ be maaboriŋ i ma.

⁴ Ka bo i la ñaameŋo niŋ fahaamuroo la, i naata fankamaayaa. I ye sanoo niŋ kodiforoo kafu ñoo ma, ka ì ke i la maaboridulaa to.

⁵ Ka bo niŋ i la ñaameŋ baa la, julayaa to, i ye i la fankoo lafaa le ka wara. I naata ke kibiri moo niŋ faŋ wara moo ti, i la fankoo kaŋ.”

⁶ Wo kamma la, Maarii Yaawe ye ñiŋ ne fo i ma ko: “I ye i faŋ muta le ko moo meŋ ñaamenta ko Alla.

⁷ Wo kamma la, m be banku moo doolu le wulindi la naŋ i kamma. Wo le mu bankoo ti meŋ jawuyaata aniŋ a tilimbaliyaata duniyaa bankoolu bee ti. Ì be i boyinkaŋ na keloo le la, ì ye i la wo dookuu ñiimaalu bee tiñaa, i ye mennu bee ke i la ñaameŋ baa la, ì be a bee horomantaŋyaa la le ka i malundi.

⁸ I jawoolu be i faa la faariñaa jawu le la, i ye taa laakira, aduŋ i te baadee dulaa soto la fo baa kono.

⁹ Niŋ i loota i faalaalu ñaatiliŋo la, fo hani saayiŋ, i be a fo la le ko, ite mu alla le ti baŋ? Bari hani wo, i maŋ ke alla ti. Hadamadiŋo doroŋ ne mu i ti, i wo faalaalu buloo kono.

¹⁰ I be faa la banku doo moolu le bulu ko Alla lombaloo. Nte Yaawe Alla faŋo le ye ñiŋ fo.”

Tire mansakewo la boyoo

¹¹ Yaawe la kumoo naata n kaŋ ko:

¹² “Hadamadiŋo, niikuyaa kumoo fo Tire mansakewo ma, i ye a fo a ye, Maarii Yaawe ye ñiŋ ne fo ko: Ite le mu nuŋ moo timmariŋolu bee misaaloo ti, meŋ be faariŋ niŋ ñaameŋo la. I la ñiiñaa maŋ ñoŋo soto.

¹³ I be Edeni le nuŋ, Alla la naakoo kono. I ñarandita bere ñiimaa siifaa bee la, wolu le mu rubi beroo ti, topasi aniŋ emeradi, kisoliti, onisi aniŋ jasipa, safiiri, turuki aniŋ berili, ì kononkesemaa be sanoo kono. I daata luŋo meŋ na, ì bee be pareeriŋ i ye le.

¹⁴ Ŋa ite le tomboŋ ka ke kantarilaa malaayikoo ti. Ŋa i londi Alla la konko senuŋo le kaŋ nuŋ. I ka taamaŋ-taamaŋ wo bere dimbaamaalu le kono.

¹⁵ Biriŋ ŋa i daa luŋo meŋ na, i daajikoo beteyaata le, a tilinta, fo luŋo meŋ na, kuu jawu naata duŋ i kono.

¹⁶ I niŋ banku jamaa niŋ moo jamaa le ka julayaa ke. I la jawuyaa naata lafaa-lafaa laalaa. I ka tu junube kewo doroŋ ne la. Wo kamma la, ŋa i bayi le ka bo Alla la konko senuŋo* kaŋ, ka i malundi. Ite meŋ keta wo kantarilaa malaayikoo ti nuŋ, ŋa i bayi wo bere dimbaamaalu kono le.

¹⁷ I naata i faŋ wara baake i la ñiiñaa kaŋ. I la ñaameŋo bee keta i ye kenseŋ ne ti i la sembe waroo kaŋ. Wo to le ŋa i fayi naŋ duuma. Ŋa i tu wo mansoolu ñaatiliŋo la, fo i si ke ì ye felefeŋo ti.

¹⁸ Ka bo niŋ i la wo kuu jawu kewolu la aniŋ i ye tilimbaliyaalu mennu ke i la julayaa waatoo la, wo le ye i la dulaa senuŋolu kosondi. Wo kamma la, n naata dimbaa mala i kono, aduŋ wo le ye i domo, fo a ye i yelemandi seebuutu kenseŋo ti bankoo to wo moolu bee ñaa la, mennu bee ye i je.

¹⁹ Wo bankoolu mennu bee ye i loŋ, ì jaakalita i la kuwo la le, kaatu i labaŋo maŋ ñiiñaa, aduŋ i nene te tara la keriŋ kotenke.”

Kiilaariyaa kumoo Sidoni saatewo ma

²⁰ Yaawe la kumoo naata n kaŋ ko:

²¹ “Hadamadiŋo, i ñaa tiliŋ Sidoni saatewo la, i ye kiilaariyaa kumoo fo a ma,

²² i si a fo Sidoninkoolu ye ko, nte Yaawe Alla buloo be laa la ì kaŋ ne, ŋa n na kallankeeyaa* lankenemayandi ì kono. Niŋ ŋa n na kiitiyo laa ì kaŋ, ka ì halaki, aniŋ ŋa n na seneyaa yitandi ì kono, wo to ì bee be a loŋ na le ko, nte le mu Yaawe ti meŋ jankuta.

²³ “M be alibalaa kuuraŋo le jindi la Sidoni kono, moofaa ye laa wo kaŋ, keloo ye bo naŋ a ye karoo bee la, aniŋ yeleboŋo ye tara a mbeedoolu bee kaŋ.

²⁴ Bari Banisirayila bankoo de, ì dandanna bankoolu te ke la ì ye ŋaniŋo ti kotenke, meŋ si ì soo waraŋ ka ì barama aniŋ ka jutunnayaa tiliŋ ì la. Niŋ wo keta le, ì be a loŋ na ko, nte le mu Yaawe ti, ì Maariyo.”

²⁵ Maarii Yaawe ye ñiŋ ne fo ko: “Niŋ ŋa Banisirayilankoolu kafu ñoo ma ka bo naŋ bankoolu bee kaŋ, ì be janjandiŋ daamennu to, aniŋ ŋa n na seneyaa yitandi ì la, fo bantala bankoolu* bee ñaa ye a je, wo to le ì be sabati la ì fansuŋ bankoo kaŋ, ŋa meŋ dii n na dookuulaa Yaakuba la.

²⁶ Ì be tara la kayiroo le kono, ì ye ì la buŋolu loo, ì ye wayini* yiri kankaŋolu tutu. Niŋ ŋa n na kiitiyo taamandi ì naaneeñoolu bee kaŋ, mennu ye kuu jawoolu laa ì kaŋ jutunnayaa kono nuŋ, wo to le ì be tara la kayiroo kono. Niŋ wo keta le, ì be a loŋ na ko, nte le mu Yaawe ti, ì Maariyo.”