Esekiyeli 27 - Mandinka Bible

Niikuyaa kumoo Tire saatewo ma

¹ Yaawe* la kumoo naata n kaŋ ko:

² “Saayiŋ, ite hadamadiŋo, niikuyaa kumoo fo Tire saatewo ma,

³ meŋ mu bundaa ti moolu ye ka duŋ baa kono, aduŋ a keta baadaa borindoo siilaalu ye waafiri dulaa le ti, i si a fo a ye, Maarii Yaawe ye ñiŋ ne fo ko: Ite Tire, i ka a fo le ko, i la ñiiñaa timmata le.

⁴ I naanewolu taata le fo baa teema. I loolaalu ye i la ñiiñaa timmandi le, komeŋ kuluŋ ñiimaa baa.

⁵ Ì ye i babaroolu dadaa niŋ junipa yiroo le la meŋ bota Seniri. Ì ye sedari* yiroolu le bondi naŋ Libanooni ka i basa looraŋ dokoo dadaa a la.

⁶ Ì ye ooki yiroo le bondi naŋ Basani, ì ye a lese jiboolu ti. Ì ye i teroo dadaa niŋ junipa yiroo le la meŋ bota Sipurusi jooyoo baa daala, ì ye i ñarandi niŋ samañiŋolu la.

⁷ I basoolu mu fatari soofaani ñiimaalu le ti ì ye mennu bondi naŋ Misira bankoo kaŋ. Wolu le mu i ye bandeeroo ti. I ye kuyaŋo meŋ wanka i kunto santo, wo bota naŋ Elisa jooyoo le to, meŋ mu bayi ñiimaa baa ti. Ì mu buluuriŋo niŋ wuluyeloo le ti.

⁸ I jaarilaalu bota Sidoni niŋ Ariwadi le. I sambalaalu mu i faŋo la kuluŋ borindi noolaalu le ti.

⁹ Kuluŋ dadaalaa kuntiyolu mennu bota naŋ Kebali niŋ ì la dookuu noolaa baalu le be i kono, ka i faroolu suki niŋ baakoo la. Kuluŋolu niŋ i dookuulaalu bee ka sembe ite le bala, ì niŋ i ka julayaa ke.

¹⁰ “Perisiya, Ludi, aniŋ Puti kewolu le be i la kelediŋ kafoo kono, aduŋ itolu le mu i la kelejawaroolu ti. Ì la koteeroolu* niŋ ì la keleraŋ nee naafoolu ka tara dendiŋ i karoo bee le la. Wolu le ka i ñiiñandi.

¹¹ Ariwadi aniŋ Heleki kewolu le ka tara kantaroo la i tata sansaŋo karoo bee la. Kammadi kewolu le ka tara i tatoolu kaŋ santo. Ì ka ì la koteeroolu deŋ i tata sansaŋo karoo bee la. Wo le ka i la ñiiñaa timmandi.

¹² “Ite Tire, i niŋ Tarisinkoolu ka julayaa ke le, kaatu i fankabaata le. Ì ka kodiforoo, newo, fuyuŋo aniŋ kurudoo faliŋ niŋ i la marisandiisoolu le la.

¹³ “I niŋ Yawaninkoolu, Tubalinkoolu, aniŋ Mesekinkoolu ka julayaa le ke. Ì ka joŋolu niŋ jaawaloolu faliŋ i la marisandiisoolu la.

¹⁴ “Moolu mennu bota naŋ Beti-Tokarima ka dookuuraŋ suwoolu, keleraŋ suwoolu, niŋ bahalewolu* le faliŋ niŋ i la marisandiisoolu la.

¹⁵ “I niŋ Dedaninkoolu ka julayaa ke le, aduŋ wo moolu mennu bota baadaa borindoo bee la mu i la kiliyaanoolu le ti. Ì ka i la marisandiisoolu faliŋ i yaa samañiŋolu aniŋ kuukuu babaroo le la.

¹⁶ “Edomunkoolu fanaa ka waafiroo ke i yaa le, kaatu i ye marisandiisi siifaa jamaa le soto. I ka ñarandiri feŋolu, borodeelu, soobayi faani ñiimaalu, aniŋ bere ñiimaalu, mennu mu kuloori siifaa jamaa ti, faliŋ niŋ i la marisandiisoolu la le.

¹⁷ “I niŋ Yahuuda niŋ Banisirayila moolu ka julayaa ke le. Wiiti* kesoo meŋ bota naŋ Minniti, ñoo, liyo, olifu* tuloo, aniŋ bala muuraŋ tuloolu, ì ka ì faliŋ niŋ i la marisandiisoolu le la.

¹⁸ “I niŋ Damasikunkoolu ka waafiroo ke le, kaatu i ye marisandiisi siifaa jamaa le soto, aduŋ i fankabaata le. Ì ka Heliboni doloo aniŋ Sahari tundoo saajiitii bayi koyoolu samba naŋ i ye le ka ì faliŋ niŋ i la marisandiisoolu la.

¹⁹ “I niŋ Dani lasili moolu niŋ Yawaninkoolu mennu bota Wusali ka julayaa ke le. Ì ka nee tunkandiŋolu, sinnamoni fata seera diimaa, aniŋ kalamusi tuloo, faliŋ niŋ i la marisandiisoolu le la.

²⁰ “I niŋ Dedaninkoolu ka julayaa ke le. Ì ka kirikee faanoolu waafi i ma le.

²¹ “Araabuduunkoolu aniŋ ñaatonkoolu mennu bee be Kedari mu i la kiliyaanoolu le ti mennu ka saajiiriŋolu, saakotoŋolu, niŋ baalu saŋ, i niŋ ì ka ñinnu waafi ñoo ma le.

²² “I niŋ juloolu mennu be Seba niŋ Raama fanaa ka julayaa ke le. Ì ka feŋ seera diimaa siifaa jamaa niŋ bere ñiimaa daa jawoolu niŋ sanoolu le faliŋ i la marisandiisoolu la.

²³ “I niŋ Harani, Kanne, aniŋ Edeni saatewolu, Seba bankoo jula baalu, aniŋ Asuri niŋ Kilimadi saatewolu, ka julayaa ke le.

²⁴ I lafinna dendika buluuriŋolu, soofaanoolu, niŋ basoolu mennu ye kuloori ñiimaalu soto, ì ka mennu debe niŋ juloo la fo ì si tanka noo tiñaa la. I niŋ ì ka julayaa ke niŋ ñinnu bee la le.

²⁵ Kuluŋolu mennu bota Tarisi le ye i la marisandiisoolu samba i ye. “Wo kamma la, ite Tire ka munta le ko i ye kuluŋo meŋ fandi niŋ marisandiisoolu la baa teema.

²⁶ I jaarilaalu le ye i samba naŋ diinoŋo kono. Wo to le tiliboo la foño baa feeta naŋ a ye i tunendi baa kono.

²⁷ I la fankoo, i la marisandiisoolu, i la kuluŋ dookuulaalu, i la kuluŋ borindilaa kuntiyolu, aniŋ i la kuluŋ dadaalaalu, i la jula baalu niŋ i la kelediŋolu, niŋ wo kafoolu bee mennu be i kono, i niŋ ì bee tunenta baa le teema, i la kasaaroo luŋo la.

²⁸ I la kuluŋ borindilaalu wuurikaŋo keta wo baa daala siilaalu bee ye kijateyoo le ti.

²⁹ Wo jaarilaalu bee, kuluŋ kono dookuulaalu niŋ ì la kuluŋ borindilaalu bee jiita naŋ ì la kuluŋolu kono, ì loota tintoo la.

³⁰ Ì kumboota le ka lemba i kunna. Ì ye i la kuwo kumboo baake le. Ì ye bankumunkoo sari ì kuŋolu to aniŋ ka i bidibidi sewo kono.

³¹ Ì ye ì kuŋolu nunku, ì ye booto funtoolu duŋ, i la kuwo kamma. Ì kumboota i kunna baake le niŋ niikuyaa baa la.

³² Ì naata niikuyaa kumoo fo i ma. Ì ye niikuyaa kumoo fo i kunna teŋ ne ko, ‘Jumaa le ka munta ko Tire, saatewo meŋ yeemanta baa kono yem?

³³ I ye i la marisandiisoolu kii duniyaa bankoolu bee kaŋ ne nuŋ, aduŋ i ka moo jamaa le balundi niŋ i la fanka baa la. Ka bo niŋ i la wo fanka baa la, aniŋ i la marisandiisoolu la, i ka duniyaa mansakee jamaa le fankamaayandi.

³⁴ Saayiŋ i tunenta baa le kono, ka taa diinoŋo kono duuma. I la marisandiisoolu niŋ i la dookuulaalu mennu be i kono, bee le niŋ i tunenta ñoo la baa kono.

³⁵ Moolu mennu bee be siiriŋ wo baadaa borindoo la, bee be silaŋo le kono. Ì la mansoolu bee be silandiŋ baake le. Hani ì ñaadaalu faŋolu ye ì la silaŋo yitandi le.

³⁶ Jula baalu mennu bee be duniyaa kono, bee le jeleta i la, kaatu i labaŋo maŋ ñiiñaa. Aduŋ i nene te soto la kotenke.’ ”