Esekiyeli 19 - Mandinka Bible

Niikuyaa suukuwo Banisirayila maralilaa ye

¹ Yaawe* ko n ye ko, “Ite hadamadiŋo, niikuyaa suukuwo laa Banisirayila maralilaa ye,

² ka a fo ko: I baamaa keta nuŋ jatamusoo le ti jatoolu kono. A ka i laa jatandiŋolu le kono, ka a diŋolu topatoo jee.

³ A ye a diŋ kiliŋ karandi a keta jata kamaliriŋo ti, a jarinteeyaata, A ka daafeŋolu muta, ka ì faa, aniŋ a ka hadamadiŋolu domo.

⁴ Bankoolu ye a kibaaroo moyi, ì ye jaloo laa a ye, a dunta ì la jaloo kono. Ì ye a kuruntu niŋ dooliŋo le la ka taa Misira bankoo kaŋ.

⁵ Kabiriŋ jatamusoo ye a je ko, jikoo maŋ tara a la kuwolu to kotenke, a jikilateyita, a ye a diŋ doo tomboŋ ka a karandi ka ke jata kamaliriŋo ti.

⁶ A ka yaayiŋ-yaayiŋ jatoolu kono, bayiri saayiŋ a kamalita le. A jarinteeyaata, a ka daafeŋolu muta, ka ì faa, aniŋ a ka hadamadiŋolu domo.

⁷ A ye ì la tatoolu bee boyi, ka ì la saatewolu kasaara. Bankoolu niŋ ì konokono feŋolu bee le silata a bumbuŋ kaŋo la.

⁸ Bituŋ bankoolu wulita a kamma, ka bo a dandaŋ na tundoolu bee to. Ì ye jaloo laa a ye, a naata duŋ ì la jaloo kono.

⁹ Ì ye a kuruntu niŋ dooliŋo la, ka a dundi daafeŋ buŋo kono jee, ka a samba Babiloni mansa yaa. Ì ye a soroŋ buŋ jawoo kono. Bituŋ moo maŋ naa a bumbuŋ kaŋo moyi kotenke, Banisirayila konkoolu kaŋ.

¹⁰ “I baamaa ka muluŋ ne ko yiri kendoo yiri kankaŋo kono, jiyo siyaata daameŋ. A ka diŋ jamaa le diŋ, bulu jamaa ka soroŋ a bala, feŋ teŋ fo jiyo la siyaa kamma.

¹¹ A buloolu bambanta le ì ka ke noo mansa dokoo ti le faŋ. A suŋo jamfata fo a be naa saŋo maa la, a buloolu warata. A la jamfoo niŋ a yiribuloolu la siyaañaa, moo bee le ka a je noo.

¹² Bari ì naata a wutu kamfaa le kono, ka a fayi duuma, tilibo foño kandoo ye a norondi. Ì ye a diŋolu bee wafu a bala. A juu bambandiŋo norota, dimbaa ye yiroo bee buruburu.

¹³ Saayiŋ ì ye a tutu keñewuloo* le kono, bankoo meŋ be jaariŋ, jii te jee.

¹⁴ Dimbaa le ye a juwo muta, a ye a diŋolu niŋ a buloolu bee jani. Hani bulu bambandiŋ kiliŋ ne maŋ tu a bala, meŋ si ke noo mansa dokoo ti.” Ñiŋ mu niikuyaa suukuwo le ti, aduŋ a ka laa niikuyaa le kono.