Esekiyeli 17 - Mandinka Bible

Sontiŋ fula la mansaaloo

¹ Yaawe* la kumoo naata n kaŋ ko:

² “Hadamadiŋo, mansaaloo fo Banisirayilankoolu ye niŋ ñiŋ misaaloo la,

³ a fo ì ye, nte Yaawe ì Maariyo ye ñiŋ ne fo ko: Sontiŋ baa doo le sotota nuŋ. A dampaŋolu warata, a ye semboo soto. A tiyolu siyaata, ì jaŋayaata, aduŋ kuloori siifaa jamaa le be a bala. A naata Libanooni. A tiita fo sedari* yiroo turoo to,

⁴ a ye a turoo kuntu, a ye a samba juloolu la bankoo kaŋ, a ye a tutu safaarilaalu la saatewo le to.

⁵ “Bituŋ sontiŋo ñiŋ ye yirindiŋ mereŋo bondi naŋ Banisirayila bankoo kaŋ, a ye a tutu banku kendiŋo le to. A ye a tutu jii daa le la ko juŋo.

⁶ A soronta, a keta yiri woyilaa ti, a woyita duuma, ka janjaŋ karoo bee la. A ye a buloolu fayi ka ì tiliŋ sontiŋo maafaŋo la, a suloolu tuta a be tuturiŋ daameŋ. Bituŋ a keta yiri kendoo ti, buloolu niŋ jamboolu soronta a bala.

⁷ “Bari sontiŋ baa doo le fanaa be jee, a dampaŋolu warata, a tiyolu siyaata. Saayiŋ ñiŋ yiroo yelemata, a ye a suloolu tiliŋ wo sontiŋ doo maafaŋo la, ka bo wo kankaŋo kono, ì ye a fii daameŋ, a ye a buloolu fayi ka tiliŋ a la fo a si jiyo soto noo a bulu.

⁸ “Bari sontiŋ foloo ye a fii daameŋ nuŋ mu banku kendiŋo le ti, jiyo siyaata daameŋ, fo yiribuloolu si soroŋ a bala, a ye diŋ, a ye ke yiri juu kendoo ti.

⁹ “A fo ì ye, nte Yaawe ì Maariyo ye ñiŋ ne fo ko: Fo a be baluu noo la le ka yiriwaa baŋ? Fo sontiŋ foloo te a suloolu wutu la baŋ? A ye a diŋolu warasi a bala, a ye a suloolu bula ì ye noro, a soroŋ kutoolu bee ye noro. A te suula la moo sembemaa jamaa la faŋ ka a wutu faŋ.

¹⁰ Hani niŋ a ye a tara, ì ye a tutu kotenke le, fo a be baluu noo la le ka yiriwaa baŋ? Niŋ tilibo foño kandoo ye a maa, fo a bee te noro la baŋ, ka a fee a ye noro wo kankaŋo kono a falinta daameŋ?”

¹¹ Wo to le Yaawe la kumoo naata n kaŋ kotenke ko:

¹² “A fo wo moo muritiriŋolu ye ko, fo ì maŋ a loŋ baŋ, ñiŋ kuwolu kotoo mu meŋ ti? A fele, Babiloni mansakewo taata Yerusalaamu, a ye Yahuuda mansa niŋ a la ñaatonkoolu muta a ye ì samba Babiloni.

¹³ Bituŋ a niŋ mansariŋ doo naata kambeŋo siti, a ye a kalindi. A naata ì la kuntiyolu fanaa samba,

¹⁴ i si a je, wo mansamarali bankoo la kuwo si jii, a kana wuli noo kotenke. Bari bankoo ñiŋ si kana noo niŋ a tententa ka a la kambeŋo muta.

¹⁵ “Bari Yahuuda mansakewo naata balaŋ Babiloni mansakewo bulu, ka kiilaalu kii Misira, ka taa kelediŋ kafu baa niŋ suwoolu ñini a ye naŋ jee. Muna fo a be ñaatotaa soto la le baŋ? Moo meŋ ka ñiŋ kuu siifaalu ke, fo wo be kana noo la le baŋ? Niŋ a ye a la kambeŋo tiñaa, a be kana noo la le baŋ?”

¹⁶ Maarii Yaawe ko: “A be koyiriŋ ñaameŋ ko nte be baluuriŋ ne: Mansa be faa la Babiloni mansakewo la bankoo le kaŋ, meŋ ye a ke mansa ti, bayiri a jututa kaloo le la, ka kambeŋo tiñaa a niŋ a teema.

¹⁷ Firawoona niŋ a la kelediŋ kafu baa, niŋ a sembe baa te a maakoyi noo la ñiŋ keloo kono, niŋ Babiloninkoolu ye seleraŋolu loo saatee tata sansaŋo bala, aniŋ ì ye seleraŋ sapoolu* loo, ka moolu niyolu kasaara.

¹⁸ A jututa kaloo le la ka kambeŋo tiñaa. Bayiri a sonta wo kambeŋo la le, a naata ñiŋ kuu siifaa ke, a te kana la muumeeke.”

¹⁹ Maarii Yaawe ye ñiŋ ne fo ko: “A be koyiriŋ ñaameŋ ko nte be baluuriŋ ne, m be mantooroo le laa la a kaŋ, kaatu a ye n na kambeŋo le tiñaa, a ye i kali n ye meŋ na.

²⁰ “M be n na jaloo laa la a ye le, aduŋ a be duŋ na n na jaloo daa le. M be a samba la Babiloni le, n niŋ a ye kiitii jee, kaatu a ye foroyaabaliyaa le ke n na.

²¹ A la kelediŋ fatiŋolu bee be faa la keloo le kono, aduŋ mennu tuta baluuriŋ, wolu be tara la janjandiŋ karoo bee le la. Wo to ali be a loŋ na le ko, nte Yaawe faŋo le ye a fo.”

²² Maarii Yaawe ye ñiŋ ne fo ko: “Nte faŋo le be sedari yiroo turoo kuntu la, ŋa a tutu. M be yiri soroŋ mereŋo le kuntu la a turu neŋo bala ŋa a tutu konko jaŋ baa kaŋ santo.

²³ M be a tutu la Banisirayila konko jaŋ baa le kaŋ, yiribuloolu ye soroŋ a bala, a ye diŋ, a ye ke sedari yiri kekuuriŋo ti. Kunu siifaa jamaa le be ñaŋo laa la a kaŋ santo, ì ye dinkiraa soto a yiribulu dubeŋo koto.

²⁴ Yiroolu bee be a loŋ na le ko, nte le mu Yaawe ti, meŋ ka yiri jaŋo boyi, ŋa yiri sutuŋo jaŋayandi. N ka yiri kitiŋo norondi le, ŋa yiri nororiŋo kitiŋyandi. Nte Yaawe faŋo le ye a fo, aduŋ m be a ke la le.”