3 Musa 12 - Mandinka Bible

Musoolu seneyandiñaa ì wuluuriŋ koolaa

¹ Yaawe* diyaamuta Musa ye,

² ka ñiŋ yaamaroolu dii Banisirayilankoolu la ko: Niŋ musoo ye konoo taa, a ye dinkewo wuluu, kosoo be tara la a bala le fo tili woorowula, ko kosoo ka tara a bala ñaameŋ tuma meŋ a ye landoo je.

³ Tili seyinjaŋo la, dindiŋo ñiŋ ñanta sunna la le.

⁴ Musoo ñiŋ si naa sabati tukuŋ fo tili taŋ saba niŋ saba, tuma meŋ wuluu yeloo be bo kaŋ a bala. A kana feŋ-wo-feŋ maa, kosoo maŋ ñaŋ na maa la meŋ na, sako a si taa Tiriliisi Senuŋo* to, fo janniŋ a la seneyandiri luŋolu be kumfaa la.

⁵ Bari niŋ a ye dimmusoo le wuluu, kosoo be tara la a bala le fo lookuŋ fula, ko a ka tara a bala ñaameŋ tuma meŋ a be landoo je kaŋ. A si naa sabati tukuŋ fo tili taŋ wooro niŋ wooro, tuma meŋ wuluu yeloo be bo kaŋ a bala.

⁶ Niŋ a la seneyandiri luŋolu kumfaata, fo a ye dinkewo waraŋ dimmusoo le wuluu baŋ, a si sanji kiliŋ saajiyo samba naŋ piriisoo* ye Bendulaa Tiriliisoo dundaŋ daa to, ka a bondi jani sadaa* ti. A si puraariŋo waraŋ puraa baa fanaa samba naŋ, ka a bondi junube kafarilaŋ sadaa ti.

⁷ Piriisoo si ì bondi sadaa ti nte Yaawe ye ka ke musoo ye seneyandiraŋo ti, aduŋ yeloo meŋ bota a bala, wo kosoo si seneyaa a bala. Ñiŋ ne mu yaamaroo ti musoo ye, meŋ ye dinkewo waraŋ dimmusoo wuluu.

⁸ Niŋ a ye a tara duŋ a maŋ saajiyo soto noo, a si puraa baa fula waraŋ puraariŋ fula naati, kiliŋo ye ke jani sadaa ti, kiliŋ doo ye ke junube kafarilaŋ sadaa ti. Piriisoo si seneyandiroo ke a ye, bituŋ a si seneyaa.