Matie 4 - TAFO AYO

Djaboro wu lɔsu Yisu

¹ Manda nœ, Ɨshirɨ nœ Ndjaba to Yisu na tœnœ ga lœ kpagagasho mbœrœ adœke djaboro wu lɔsu ye.

² Manda kœmbœrœ ɔlɔ zazu bisha œdœ butshɔ zazu bisha ndœ kœyotshelœma, Yisu sœ lima dœ ogo.

³ Djaboro, ayi kœwu lɔsu, na ndoo dœ she yé œ pa adœke: «Œdœ ɓœ kœdœ Gbolo nœ Ndjaba, pa fœ badja asœke œ fatœ ye tœ mapa.»

⁴ Kashe Yisu gi adœke: «Endje sú ɓa la Buku nœ Ndjaba adœke: “Uzu œ sœ dœ soro kolœ mbœrœ mapa nene, kashe dœ o'o kɔ á wuta lœ ama Ndjaba.”»

⁵ Dœ tœnœ ataa, djaboro na dœ she œrrr ɓa lœ Yerusaleme á dœ ongbo á sœ yerœ, œ za she tɔ ɓa pa kumu Tepelo,

⁶ á œ pa fœ she adœke: «Œdœ ɓœ kœdœ Gbolo nœ Ndjaba, i dœ tœ zœ tshirɨ ga atɨ. Gbambanœ nene, endje sú ɓa la buku nœ Ndjaba adœke: “Ndjaba œ za awa o'o fœ aandjelu nœ ye mbœrœ ɓœ, endje za ɓœ ga atɨ dœ kane endje mbœrœ á ɓœ kœzaza ada zœ tɔ badja nene.”»

⁷ Yé Yisu gi fœ she adœke: «Endje su ndje ɓa la Buku nœ Ndjaba adœke: “Wuwu lɔsu Gbozu Ndjaba nœ zœ nene.”»

⁸ Djaboro kpa ɔ dœ she œrrr ɓa tœ leta kumu ɨngɨrɨ kaga œ ma ogo gbozu tshapashɔ djigi dœ ɔtshɔrœ, ndje dœ mokɔnœ fœ she,

⁹ yé á pa fœ she adœke: «Mœ ko œrœnœ asœke kɔ fœ ɓœ œdœ ɓœ kœgote ga utshu mœ mbœrœ kœdonga mœ.»

¹⁰ Yé Yisu kœgi fœ she adœke: «Gitœ zœ ga zœ, Satana! Gbambanœ nene, endje sú ɓa la buku nœ Ndjaba adœke: “Donga Gbozu Ndjaba nœ zœ, yé œ za avwala kolœ fœ she tshebabale.”»

¹¹ Ndara tœ asœke, djaboro kœkatœ ye yé. Aandjelu kœgitœ endje ndoo dœ she, yé á kœtetœ kœmbœrœ akwa fœ she.

Yisu tetœ kœmbœrœ akwa nœ ye ɓa lœ Galilayi

¹² Lɔkɔ á Yisu dji adœke endje za Yowane ayi kœza batisimu ga lœ kánga, tshe kwatœ ye ga lœ Galilayi.

¹³ Tshe katœ Nazarete tɨ, œ na kœsœ ɓa lœ Kaparnawumu, ongbo á sœ tœ mangu egerœ ungu adanga nœ Galilayi, ɓa lœ ogo Zabulone œdœ pe ɓa lœ Nefetali.

¹⁴ Œ sœ lima ataa mbœrœ adœke o'o á ayi kœgbara o'o Isaya pa tœnœ, kœmbœrœtœ endje. Tshe pa o'onœ adœke:

¹⁵ «Ogo Zabulone œdœ Nefetali, á sœ tœ awa kœro ga la egerœ ungu adanga, ɓa kele ungu Yɔrdane, ogo Galilayi á angbɨ azu sœ lœnœ asœmœ!

¹⁶ Azunœ á endje sœ lœ ubu osho asœmœ, wu egerœ ɨngbɨsho! Mbœrœ endjeneke á endje sœ lœ ubu osho nœ kuzu, ɨngbɨsho wuta ga pa endje!»

¹⁷ Pe dœ lɔkɔnœ asœmœ, Yisu tetœ kœyisœ œrœ adœke: «'E yapa ɔtshɔ 'e, gbambanœ nene, Ogo gbozu nœ tshalafo ndo ye!»

Yisu e ali ayambarœ nœ ye

¹⁸ Ɔlɔ bale, Yisu sœ lima kœna tœ mangu egerœ ungu adanga nœ Galilayi, yé œ wu aayazu bisha, Shimu á anga ɨ'ɨrɨ ye kœdœ Petro œdœ ayanœ dœ Andere á endje dœ lima aayi kœpara ageatshalangu. Endje sœ lima kœvwi gbanda ɓa la egerœ ungu adanga.

¹⁹ Yisu pa fœ endje adœke: «'E na manda mœ, mœ fa 'e tœ aayi kœpara azu.»

²⁰ Pe kpœtœ œsœnœ, endje ka lima tœ gbanda nœ endje tɨ yé œ na manda ye.

²¹ Tshe na lœ ɨngɨrɨnœ, œ kpa wu anga aayazu bisha, Ayakobo dœ ayanœ dœ Yowane, endje kœdœ agbolo nœ Zebedayi. Endje sœ lima lœ agba nœ endje awa bale dœ aba endje dœ Zebedayi, yé œ sœ lima tœ kœguma gbanda nœ endje. Yisu e endje.

²² Pe kpœtœ œsœnœ, endje katœ agba œdœ aba endje tɨ, yé œ na manda ye.

Yisu yisœ œrœ yé œ she azu

²³ Yisu ro djelœ ogo Galilayi djigi; tshe sœ lima kœyisœ œrœ ɓa lœ Sinagoga para. Tshe sœ lima kœmɨndœ Ɔtshɔ O'o nœ ogo gbozu yé œ sœ lima kœshe azu lœ koɓa œdœ lœ gbakɨndɨ nœ endje kɔ.

²⁴ Upu nœ ye za lima ogo Siri djigi, yé endje sœ lima kœna dœ azu á endje sœ lima dœ tshelœ aka koɓa kɔ fœ she, azu á endje sœ dœ ekpe ɨshirɨ pa endje, dœ azu á endje sœ dœ koɓa ɔkɔ œdœ endjeneke á ada endje tshu. Yé Yisu she lima endje ye.

²⁵ Ukpulu azu ndjoro na lima manda ye: Endje to lima ɓa lœ Galilayi, ɓa lœ ogonœ á endje e ɨ'ɨrɨnœ adœke tshalakpɨ ndjokpa asœmœ, dœ azu Yerusaleme ndje dœ ogo Yuda, œdœ endjeneke ɓa lœ ogo á sœ ɓa kele ungu Yɔrdane.