Zakarii 6 - Mbeti ti Nzapa - Tënë so amu fini

Miombe ye so wayanga-Nzapa abaa: apusu ti mbarata osio

¹ Mbi kiri mbi yo le ti mbi na nduzu si na ya ti mbeni ye tongana bango-li, mbi baa apusu ti mbarata osio so alondo na popo ti ahoto use si ayeke ga. Ahoto ni ayeke na bengba wen.

² Na tere ti kozo pusu ti mbarata ni, a kanga ambarata so tere ti ala abe bengo; na tere ti use pusu ni, a kanga ambarata so tere ti ala avuko vukongo;

³ na tere ti ota pusu ni, a kanga ambarata so tere ti ala avuru vurungo si na tere ti osio pusu ni, a kanga ambarata so nzoroko ti bengba ayeke na tere ti ala.

⁴ Mbi kiri mbi hunda ange so ayeke tene tënë na mbi so, mbi tene: “Kota zo, apusu ti mbarata so aye ti fa nyen?”

⁵ Ange ni akiri tënë na mbi: “Ala yeke andangoro osio ti le ti nduzu. Ala yeke luti ando na dawa ti *KOTA GBIA so ayeke Makonzi ti sese kue; fadeso ala londo ti hon.”

⁶ Pusu so a kanga avuko mbarata na tere ni ague na mbage ti Banga; pusu so a kanga avuru mbarata na tere ni ague na mbage ti Do; pusu so a kanga ambarata so nzoroko ti bengba ayeke na tere ti ala ague na mbage ti Mbongo.

⁷ Ambarata so tere ti ala abe tuuu so aga si be ti ala ayeke do dongo ti tambula na ndö ti sese. Tongaso, KOTA GBIA amu yanga na ala, atene: “Ala gue, atambula na ndö ti sese!” Apusu ti mbarata ni atambula na ndö ti sese.

⁸ Tongaso KOTA GBIA airi mbi si atene na mbi: “Mo baa, ala so ayeke gue na mbage ti Banga ayeke sara titene Yingo ti mbi aduti na ya ti kodro ti mbage ti Banga.”

Fade a yeke zia kpoto ti gbia na li ti Yeshua

⁹ Tënë ti *KOTA GBIA asi na mbi, atene:

¹⁰ “Azo so a gbu ala si a gue na ala na kodro wande amu aye na Heldai, Tobia nga na Yedaya si ala ga na ni. Mo wani, mo gue laso na da ti Yosia, molenge ti Sefania, fade mo yeke wara azo ni kâ; ala londo na Babilone, ala si fafadeso. Mo gue, mo mu aye ni na maboko ti ala.

¹¹ Fade mo mu wen ti nginza na lôro, mo leke na kpoto ti gbia, mo zia na li ti kota wayango-sandaga, Yeshua, molenge ti Yosadak.

¹² Na pekoni, mo tene na lo, mo tene: Tënë so KOTA GBIA so ayeke na ndö ti dunia kue atene ayeke so: Mbeni koli ayeke ge, iri ti lo ayeke: ‘Kete keke so asigigi’. Na ndo so kue lo yeke daa, akeke ayeke sigigi, fade lo yeke kiri ti leke kota da ti mbi.

¹³ Biani, lo laa lo yeke kiri ti leke kota da ni. Lo yeke yu abongo ti gbia, lo yeke duti na ndö ti mbata ti gbia ti sara komandema na ndö ti azo. Mbeni wayango-sandaga ayeke duti na tere ti lo. Ala use kue ayeke ma tere na popo ti ala nzoni.

¹⁴ ‘Ti kpoto ti gbia ni, fade ayeke ngba na ya ti kota da ti KOTA GBIA titene azo adabe ti ala na Heldai, Tobia nga na Yedaya; ala dabe ti ala nga na nzoni be ti molenge ti Sefania.’ ”

¹⁵ Azo so ayeke na yongoro ndo ayeke ga ande ti kiri ti leke kota da ti KOTA GBIA. Tongaso, fade ala yeke hinga atene, KOTA GBIA so ayeke na ndö ti dunia kue laa atokua mbi na ala. Ye ni ayeke si ande tongana ala ma yanga ti KOTA GBIA, Nzapa ti ala biani.