Zakarii 5 - Mbeti ti Nzapa - Tënë so amu fini

Omene ye so wayanga-Nzapa abaa: buku ti dengo ba

¹ Mbi kiri mbi yo le ti mbi na nduzu si na ya ti mbeni ye tongana bango-li, mbi baa mbeni mbeti so a rule ni rulengo si ayeke huru na le ti nduzu.

² *Ange ni ahunda mbi, atene: “Mo baa nyen?” Mbi kiri tënë: “Mbi baa mbeni mbeti so ayeke huru na le ti nduzu; yongoro ni ayeke metere baleoko si nduru ni ayeke metere oku.”

³ Tongaso lo tene na mbi: “Mbeti ni ayeke mbeti ti dengo ba so mbi yeke tokua na ndö ti kodro ni kue. Na le ti mbeti ni, na mbeni mbage ni oko, a su atene: fade a yeke tumba azo ti nzi kue na ya ti kodro ni; na le ti mbeni mbage ti buku ni, a su nga atene: fade a yeke tumba azo so kue ayeke deba ti mvene.

⁴ So tënë ti yanga ti *KOTA GBIA so ayeke na ndö ti dunia kue laa: mbi yeke tokua deba ni titene ali na ya ti da ti zo ti nzi, nga na ya ti da ti zo ti dengo ba ti mvene na iri ti mbi. Dengo ba ni ayeke ngba na ya ti da ti azo ni, ayeke buba ni kue, ataa akeke ti li ni, ataa atêne ni.”

Mbarambara ye so wayanga-Nzapa abaa: wali so afa limo ti ye ti sioni

⁵ *Ange so ayeke tene tënë na mbi so aga si atene na mbi: “Yo le ti mo na nduzu, mo baa ye so ayeke ga so.”

⁶ Mbi hunda lo, mbi tene: “Ye ni aye ti fa nyen?” Lo kiri tënë: “Sakpa laa ayeke ga so.” Lo kiri lo tene: “Asioni ye ti kodro ni kue laa ayeke na ya ni so.”

⁷ Na ndembe ni so, yanga ti sakpa ni so a sara na nengo wen so azi; yanga ti sakpa ni ayeke *kerebende. Baa, mbeni wali ayeke duti na ya ti sakpa ni!

⁸ Ange ni atene na mbi: “Wali so afa limo ti sioni ye.” Na pekoni, ange ni apusu wali ni na ya ti sakpa ni si abi yanga ni so a sara na nengo wen so daa.

⁹ Mbi yo le ti mbi na nduzu si na ya ti mbeni ye tongana bango-li, mbi baa awali use so ayeke ga. Amaboko ti ala ayeke daa tongana *kpangi ti kota ndeke. Pupu ayeke ya na ya ti kpangi ti ala si amu ala ahon na ala na le ti nduzu. Awali ni ayo sakpa ni ahon na ni na le ti nduzu, na popo ti sese na yayu.

¹⁰ Mbi hunda ange so ayeke tene tënë na mbi so, mbi tene: “Ala yeke gue na sakpa ni na ndo wa?”

¹¹ Lo kiri tënë na mbi: “Ala yeke gue na ni na Mezopotamii. Kâ, ala yeke sara mbeni da ndali ti lo; ala yeke leke mbeni ndo ti zia lo na ndö ni si lo yeke luti ngangu.”