Zakarii 4 - Mbeti ti Nzapa - Tënë so amu fini

Oku ye so wayanga-Nzapa abaa: gere ti alamba na akeke ti olive

¹ *Ange so ayeke tene tënë na mbi so akiri aga si lo zingo mbi tongana ti so a yeke zingo zo na lango.

² Lo hunda mbi, lo tene: “Nyen laa mo baa, nyen?” Mbi kiri tënë: “Mbi baa na ya ti mbeni ye tongana bango-li, mbeni gere ti alamba so a sara ni kue na lôro. Na mbage ti li ni, mbeni ta ti ziango mafuta na ya ni ayeke daa. Alamba mbarambara ayeke na ndö ti gere ti alamba ni; lamba oko oko ayeke na kamba mbarambara so mafuta ayeke hon na ya ni ti gue na ya ti alamba ni.

³ Na tere ti ta ti mafuta ni, akeke ti olive use ayeke daa, oko na mbage ti maboko ti koli si oko na mbage ti maboko ti wali.”

⁴ Mbi hunda ange so ayeke tene tënë na mbi so, mbi tene: “Kota zo, aye so aye ti fa nyen?”

⁵ Ange ni akiri tënë na mbi, atene: “Mo hinga nda ti aye so pepe?” Mbi tene: “Ên-en! Mbi hinga ape, kota zo.”

^6a Tongaso lo kiri lo tene na mbi, lo tene:

^10b “Alamba mbarambara so afa le ti *KOTA GBIA so ayeke baa ndo na ndö ti dunia kue.”

¹¹ Mbi kiri mbi hunda lo, mbi tene: “Akeke ti olive use so, mbeni na mbage ti maboko ti koli si mbeni na mbage ti maboko ti wali ti gere ti alamba ni so aye ti fa nyen?”

¹² Mbi kiri mbi hunda lo ti fani use ni, mbi tene: “Amaboko use ti keke ti olive so ayeke na tere ti akamba use so a sara ni na lôro si mafuta ayeke hon na ya ni ti gue na ya ti alamba ni aye ti fa nyen?”

¹³ Lo tene na mbi: “Mo hinga nda ni pepe?” Mbi kiri tënë: “Ên-en! Mbi hinga ape, kota zo.”

¹⁴ Tongaso lo tene na mbi: “Akeke ti olive ni ayeke akoli so a tuku mafuta na li ti ala si a zia ala nde ndali ti kua ti KOTA GBIA, lo so lo yeke Makonzi ti sese kue.”

KOTA GBIA amu zendo ndali ti Zorobabel

^6b Tënë so *KOTA GBIA atene ndali ti Zorobabel ayeke so: Tënë so KOTA GBIA so ayeke na ndö ti dunia kue atene laa: “Na lege ti ngangu ti mo wani, wala na lege ti sarango ngangu na azo si mo yeke sara na kua ni pepe, me na lege ti Yingo ti mbi.”

⁷ Ange ni akiri atene: “Kota hoto, mo yeke nyen? Na dawa ti Zorobabel, mo ga kpangbara ndo. Na ndo so laa lo yeke sigigi na kozo têne ti gere ti da ni. Fade azo ayeke dekongo, atene: ‘So pendere têne! So pendere têne!’ ”

⁸ Tënë ti KOTA GBIA asi na mbi, atene:

⁹ “Zorobabel laa alu agere ti kota da ni, lo laa lo yeke hunzi kua ti da ni.” Tongana ye ni asi, fade ala yeke hinga atene, KOTA GBIA so ayeke na ndö ti dunia kue laa atokua mbi na ala.

^10a Zo wa laa abaa akozo lango ti akua ni so ato nda ni kete kete so tongana senge ye na le ti lo? Tongana ala baa kozo têne ni so na maboko ti Zorobabel, ayeke nzoni ala sara ngia!