Zakarii 10 - Mbeti ti Nzapa - Tënë so amu fini

Ala hunda ye gi na KOTA GBIA

¹ Ala hunda na *KOTA GBIA titene lo tokua na ala tanga ti ngu-Nzapa. KOTA GBIA laa ayeke sara si ngangu pupu ti ngu-Nzapa aya; fade lo yeke sara nga titene ngu-Nzapa apika mingi si lo yeke sara titene kugbe ti kasa amai na yaka ti zo oko oko.

² Anzapa ti da ayeke kiri na ala atënë ti mvene, azo ti bango nda ti aye ayeke fa na ala nda ti ye na legeni pepe; abango-li ti ala ayeke gi asenge ye, atënë ti dengo be so ala yeke tene na azo ayeke gi ye ti handango azo ni. Ndani laa azo ni ague, mawa na be ti ala tongana ataba so zo ti batango ala ayeke daa pepe.

KOTA GBIA amu zendo ti zi azo ti lo

³ *KOTA GBIA atene: “Ngonzo ti mbi alondo tongana wâ na tere ti azo ti batango ataba; mbi yeke ga na tere ti akoli-ngasa. Biani, mbi KOTA GBIA so mbi yeke na ndö ti dunia kue, mbi yeke ga ti sara nzoni na ataba ti mbi, ataba ti mbi so ayeke azo ti mara ti Juda. Fade mbi yeke sara titene ala ga tongana nzoni mbarata ti sarango na bira.

⁴ Amakonzi nde nde ayeke sigigi ande na popo ti azo ti mara ti Juda; ala yeke duti ande tongana ngangu têne ti gere ti da, tongana keke ti gbungo-li ti da ti bongo, tongana kokora ti tiringo na bira.

⁵ Amakonzi ni ayeke duti tongana angangu zo ti bira; ala yeke do azo so ayeke tiri bira na ala tongana ti so zo ayeke do potopoto ti ndö ti lege. Ala yeke tiri bira ni tongaso, ngbanga ti so mbi KOTA GBIA, mbi yeke na ala. Fade kamene ayeke gbu le ti azo ti kpengo na mbarata so ayeke awato ti ala.

⁶ Fade mbi yeke mu ngangu na azo ti Juda, mbi yeke soo azo ti Israel. Mbi yeke kiri na ala na kodro ti ala, ngbanga ti so mbi yeke baa mawa ti ala. Ala yeke duti tongana azo so, mo baa mo tene, mbi ke ala laoko pepe. Biani, mbi yeke KOTA GBIA, Nzapa ti ala, fade mbi yeke ma sambela ti ala.

⁷ Azo ti mara ti Efraim ayeke duti na ngangu tongana angangu zo ti bira; be ti ala ayeke si singo na ngia tongana ti zo so anyon vin. Na bango ala, tere ti amolenge ti ala ayeke nzere si ala yeke dodo na ngia ndali ti KOTA GBIA.

⁸ Fade mbi yeke iri azo ti mbi si mbi yeke bongbi ala na ndo oko, ngbanga ti so mbi zi ala awe; ala yeke kiri ti wu mingi tongana ti kozo.

⁹ Mbi kangbi lani ala na popo ti amara nde, me kâ, na yongoro ndo, ala yeke dabe ti ala na mbi; ala na amolenge ti ala ayeke duti kâ si na pekoni, ala yeke kiri.

¹⁰ Mbi yeke zi ala na kodro ti Ezipte nga na kodro ti Asirii ti sigigi na ala, mbi yeke bongbi ala na ndo oko; mbi yeke sara si ala kiri na sese ti Galaad nga na sese ti Liban. Ataa so kue, ndo ayeke lingbi ala pepe.

¹¹ Fade ala yeke fâ kota ngu-ingo ti pasi; mbi KOTA GBIA, mbi yeke pika *amapo ti kota ngu-ingo ni. Ataa agbe ti *bale ti Nil ayeke hole kue. Baba ti azo ti Asirii ayeke ti si komandema ti gbia ti Ezipte ayeke hon.

¹² Mbi yeke mu ngangu na azo ti mbi si ala yeke sara ye gi na iri ti mbi”; so tënë ti yanga ti KOTA GBIA laa.