Sigingo 9 - Mbeti ti Nzapa - Tënë so amu fini

Oku kpale ni: sioni kobela ati na ndö ti anyama kue

¹ KOTA GBIA atene na Moïse: “Gue na ndo ti Faraon si mo tene na lo, mo tene: ‘Tënë so KOTA GBIA, Nzapa ti ahebro atene ayeke so: Zia lege na azo ti mbi titene ala gue, avoro mbi.

² Tongana mo ngba ti ke, tongana mo ngba ti gbanzi ala,

³ fade maboko ti KOTA GBIA ayeke sara ngangu na anyama ti mo so ayeke te pere na ngonda: mbeni sioni kobela ti ngangu ayeke ti na ndö ti ambarata, alele, *azambala, abagara nga na ataba.

⁴ Me KOTA GBIA ayeke sara kangbi na popo ti anyama ti azo ti Israel na anyama ti azo ti Ezipte. Mbeni nyama oko ti azo ti Israel ayeke kui pepe.’ ”

⁵ Na ndö ni kue, KOTA GBIA afa mbeni ngoi, atene: “Kekereke laa mbi yeke sara ye so na ya ti kodro ni.”

⁶ Lango oko na pekoni, KOTA GBIA asara ye ni: anyama kue ti azo ti Ezipte akui, me na popo ti anyama ti azo ti Israel, mbeni oko akui pepe.

⁷ Faraon atokua azo ti gue ti baa ye ni. Na popo ti anyama ti azo ti Israel, mbeni oko akui pepe. Me Faraon angba ti sara ngangu li si lo ke ti zia lege na azo ti Israel ti gue.

Omene kpale ni: ka ti sanzo

⁸ KOTA GBIA atene na Moïse na Aaron: “Ala mu mburu ti wâ ti fur asi ya ti maboko ti ala. Fade Moïse ayeke tuku ni na nduzu na dawa ti Faraon.

⁹ Mburu ti wâ ni ayeke ga tongana fuku ti sese si ayeke mu ndö ti kodro ti Ezipte kue. Na pekoni, na ya ti kodro ti Ezipte kue, mburu ti wâ ni ayeke sara ka ti sanzo na tere ti azo nga na tere ti anyama.”

¹⁰ Moïse na Aaron amu mburu ti wâ ni si ala gue na ndo ti gbia Faraon. Moïse atuku mburu ti wâ ni na nduzu; mburu ti wâ ni asara si aye asuku na tere ti azo nga na tere ti anyama si aga aka ti sanzo.

¹¹ Azo ti mazi ti Ezipte alingbi ti luti na dawa ti Moïse pepe ndali ti aye so asuku na tere ti ala so. Biani, asukungo ye ni amu tere ti ala kue nga na tere ti azo ti Ezipte kue.

¹² Me KOTA GBIA akpengba be ti Faraon, asara si lo ma Moïse na Aaron pepe, alingbi na tënë so KOTA GBIA atene na Moïse.

Mbarambara kpale ni: pembe ti bekpa

¹³ KOTA GBIA atene na Moïse: “Kekereke na kota ndaperere, mo londo mo gue, mo luti na dawa ti Faraon. Fade mo tene na lo: ‘Tënë so KOTA GBIA, Nzapa ti ahebro atene ayeke so: Zia lege na azo ti mbi titene ala gue, avoro mbi.

¹⁴ Taa ti so ni, mbi yeke tokua mara ti angangu kpale kue na ndö ti mo wani, na ndö ti azo ti gbe ti mo nga na ndö ti azo ti kodro ti mo, tongaso si mo yeke hinga, mo tene, na ndö ti sese so, mbeni zo oko ti lingbi na mbi ayeke daa pepe.

¹⁵ Tongana mbi yoro fade maboko ti mbi ti bi sioni kobela ti bubango kodro na tere ti mo nga na tere ti azo ti mo, ka ala hunzi na ndö ti sese so biani awe.

¹⁶ Me mbi zia mo, mo ngba na fini titene mbi fa ngangu ti mbi na mo, titene na lege ti mo, azo agonda iri ti mbi na ndö ti sese kue.

¹⁷ Ataa so kue, mo ngba ti kanga lege na azo ti mbi titene ala gue.

¹⁸ Ndani laa, kekereke gi na oko ngbonga so, mbi yeke sara titene *pembe ti bekpa atuku ngangu ngangu. Mara ti ye tongaso ade ti si laoko pepe na Ezipte, ngbene ye so kodro ni abaa gigi ngbii asi fadeso.

¹⁹ Fadeso, tokua ndo titene azo abongbi anyama ti mo na aye ti mo so kue ayeke na ngonda ti zia ala na ya ti da. Azo na anyama so kue angba na yaka si a kiri na ala na ya ti da pepe, fade apembe ti bekpa ni ayeke tuku na ndö ti ala si ala yeke kui.’ ”

²⁰ Ambeni zo ti gbe ti Faraon asara mbeto ndali ti tënë so KOTA GBIA atene; tongaso ala bongbi azo ti kua ti ala na anyama ti ala na ya ti ada.

²¹ Me ambeni abaa tënë ni tongana mbumbuse ye; ala zia azo ti kua ti ala na anyama ti ala na yaka.

²² KOTA GBIA atene na Moïse: “Yoro maboko ti mo na nduzu titene pembe ti bekpa atuku na ndö ti Ezipte kue, na ndö ti azo, na ndö ti anyama nga na ndö ti akobe ti yaka ti kodro ni!”

²³ Moïse ayoro keke ti lo na nduzu. KOTA GBIA atokua bekpa na pembe ti bekpa: bekpa asungba na ndö ti sese, na pekoni, KOTA GBIA asara si pembe ti bekpa atuku na ndö ti kodro ti Ezipte.

²⁴ Pembe ti bekpa atuku, bekpa asungba abongbi na pembe ti bekpa si atuku ngangu ngangu. Ngbene ye so Ezipte abaa gigi si aga mara, azo ti kodro ni ade ti baa mara ti tukungo ti pembe ti bekpa tongaso laoko pepe.

²⁵ Na ya ti kodro ti Ezipte kue, pembe ti bekpa atuku na ndö ti aye so kue ayeke na yaka, azo na anyama. Pembe ti bekpa ni abuba akugbe ti kasa ti yaka kue si akungbi akeke kue.

²⁶ Gi na sese ti Goshen oko, ndo so azo ti Israel aduti daa laa pembe ti bekpa atuku daa pepe.

²⁷ Faraon atokua a iri Moïse na Aaron si lo tene na ala: “Ti so ni, mbi sara sioni awe! Mbi na azo ti mbi, e sara sioni; KOTA GBIA laa ayeke mbirimbiri.

²⁸ Ala sambela KOTA GBIA titene sioni bekpa na pembe ti bekpa ni akai. Mbi yeke zia lege na ala ti gue; ala yeke kiri ti luti na ndo so pepe.”

²⁹ Moïse akiri tënë na lo: “Gi so mbi yeke sigigi na ya ti gbata ni, mbi yeke yoro maboko ti mbi na mbage ti KOTA GBIA ti sambela lo. Fade bekpa na pembe ti bekpa ni ayeke kai. Tongaso, mo yeke hinga, mo tene, sese ayeke ti KOTA GBIA.

³⁰ Me mbi hinga, mbi tene, mo na azo ti gbe ti mo, fade ala yeke kpe mbeto ti KOTA GBIA Nzapa pepe.”

³¹ *Len na *orze abuba awe, ngbanga ti so le ti orze ni asigigi awe si len ni amu kongo awe.

³² Me ambeni mara ti ale ti *ble nde nde abuba pepe, ngbanga ti so ala sigigi ti ala na pekoni.

³³ Moïse alondo na ndo ti gbia Faraon nga na ya ti gbata ni, lo sigigi. Lo yoro maboko ti lo na mbage ti KOTA GBIA si lo sambela. Tongaso bekpa na pembe ti bekpa akai; ngu-Nzapa akiri apika pepe.

³⁴ So Faraon abaa so ngu-Nzapa, pembe ti bekpa na bekpa ni akai awe, lo kiri lo sara gi oko sioni: lo na azo ti gbe ti lo, ala ngba ti sara ngangu li.

³⁵ Be ti Faraon angba ti kpengba si lo ke ti zia lege na azo ti Israel ti gue, alingbi na tënë so KOTA GBIA atene na Moïse.