Sigingo 7 - Mbeti ti Nzapa - Tënë so amu fini

¹ Me KOTA GBIA atene na Moïse: “Baa, mbi zia mo tongana nzapa na ndö ti Faraon; fade ita ti mo Aaron ayeke ga zo ti tenengo peko ti tënë ti yanga ti mo.

² Atënë so kue mbi mu yanga na mo daa, fade mo yeke tene ni na Aaron, ita ti mo. Na pekoni, lo laa lo yeke tene peko ni na Faraon titene Faraon azia lege na azo ti Israel ti sigigi na ya ti kodro ti lo.

³ Ti mbi, mbi yeke sara si be ti Faraon akpengba; mbi yeke sara aye ti kpene na aye ti dongo be mingi na kodro ti Ezipte.

⁴ Me lo yeke ma ala pepe. Tongaso, mbi yeke fâ ngbanga ti ngangu na ndö ti azo ti Ezipte si mbi yeke zi azo ti mbi, azo ti Israel, na kodro ti Ezipte ti sigigi na ala na lege ti molongo ti amara ti ala oko oko.

⁵ Na ndembe so mbi yeke yoro maboko ti mbi na ndö ti Ezipte si mbi yeke zi azo ti Israel na popo ti ala ti sigigi na ala, na ndo so laa azo ti Ezipte ayeke hinga atene, mbi laa mbi yeke KOTA GBIA.”

⁶ Moïse na Aaron asara ye ni tongaso; ala sara ye ni alingbi gi na yanga so KOTA GBIA amu na ala.

⁷ Na ngoi so Moïse na Aaron ague, atene tënë na Faraon so, ngu ti Moïse ayeke balemiombe, ngu ti Aaron ayeke balemiombe na ota.

Faraon ake ti ma Moïse na Aaron

⁸ KOTA GBIA atene na Moïse na Aaron:

⁹ “Tongana Faraon ahunda na ala ti sara mbeni ye ti dongo be, fade mo Moïse, mo tene na Aaron ti mu keke ti lo, ti bi na sese na dawa ti Faraon; fade keke ni ayeke ga ngbo.”

¹⁰ Moïse na Aaron ague na ndo ti Faraon si ala sara ye ni gi tongana ti so KOTA GBIA amu yanga na ala. Aaron abi keke ti lo na dawa ti Faraon nga na dawa ti azo ti gbe ti lo si keke ni aga ngbo.

¹¹ Me gbia Faraon airi azo ti hingango nda ti aye nga na anganga; azo ti mazi ti Ezipte so asara gi mara ti ye so na lege ti mazi ti ala.

¹² Zo oko oko abi keke ti lo na sese si keke ni aga ngbo. Me keke ti Aaron amene akeke ti ala kue.

¹³ Ataa so kue, be ti Faraon angba ti kpengba alingbi na tënë so KOTA GBIA atene. Lo ma Moïse na Aaron pepe.

Kozo kpale ni: ngu aga mene

¹⁴ KOTA GBIA atene na Moïse: “Gbia Faraon angba ti sara ngangu li; lo ke ti zia lege na azo ti Israel ti gue.

¹⁵ Na kota ndaperere, mo gue, mo wara Faraon na ndembe so lo yeke gue na yanga ti *bale ti Nil. Mo luti mo ku lo na yanga ti ngu ni. Keke so lani aga ngbo so, mo mu ni na maboko ti mo.

¹⁶ Mo tene na Faraon, mo tene: ‘KOTA GBIA, Nzapa ti ahebro atokua mbi ti tene na mo, atene: Zia lege na azo ti mbi titene ala gue, avoro mbi na benyama.’ Me mo ye ti ma pepe ngbii asi laso.

¹⁷ Tënë so KOTA GBIA atene ayeke so: ye so ayeke fa ti hinga atene mbi yeke KOTA GBIA ayeke so: mbi yeke pika ngu ti Nil na keke so ayeke na maboko ti mbi so si ngu ni ayeke ga mene.

¹⁸ Asusu ti ya ti bale ni ayeke kui, ngu ni ayeke fun si azo ti Ezipte alingbi ti nyon ni pepe.”

¹⁹ KOTA GBIA akiri atene na Moïse: “Tene na Aaron, mo tene: Mu keke ti mo, yoro maboko ti mo na ndö ti angu ti Ezipte, na ndö ti abale, na ndö ti angu so ayeke sua na ya ti adu, na ndö ti angu ti *alende, na ando so kue ngu ayeke daa. Fade angu ni ayeke ga mene. Tongaso fade mene ayeke mu ya ti kodro ti Ezipte kue, ya ti asembe so a sara na keke nga na asembe so a sara na têne.”

²⁰ Moïse na Aaron asara tongana ti so KOTA GBIA amu yanga na ala. Aaron ayoro keke ti lo na nduzu si na le ti Faraon na azo ti gbe ti lo, lo pika ngu ti Nil si ngu ni kue aga mene.

²¹ Asusu ti ya ti bale ni akui, ngu ni afun si azo ti Ezipte alingbi ti nyon ni pepe. Mene amu ya ti kodro ti Ezipte kue.

²² Me azo ti mazi ti Ezipte asara gi mara ti ye so na lege ti mazi ti ala. Be ti Faraon angba ti kpengba, lo ma Moïse na Aaron pepe, alingbi na tënë so KOTA GBIA atene.

²³ Faraon azia peko na ala, lo kiri na ndo ti lo si lo baa ye ni tongana senge ye na le ti lo.

²⁴ Azo ti Ezipte kue azi adu na yanga ti bale ti Nil titene ala wara nzoni ngu ti nyongo ni, ngbanga ti so ala lingbi ti nyon ngu ti Nil pepe.

²⁵ Lango mbarambara ahon na peko ti so KOTA GBIA apika bale ti Nil.

Use kpale ni: akongba

²⁶ KOTA GBIA atene na Moïse: “Gue na ndo ti Faraon si mo tene na lo, mo tene: Tënë so KOTA GBIA atene ayeke so: Zia lege na azo ti mbi titene ala gue, avoro mbi.

²⁷ Tongana mo ngba ti ke, fade mbi yeke sara titene akongba amu ya ti kodro ti mo kue.

²⁸ Akongba ni ayeke si singo na ya ti bale ti Nil, ala yeke londo na ya ti bale ni ti li na ya ti yangbo ti mo, na ya ti kubu ti mo, na ndö ti gbogbo ti mo; ala yeke li na ya ti ada ti azo ti gbe ti mo, na ya ti ada ti azo ti kodro ti mo, na ya ti afur ti mo, na ya ti akota du ti sembe so a yeke gbu ya ti farini ti mo daa.

²⁹ Akongba ni ayeke ko na ndö ti mo, na ndö ti azo ti gbe ti mo kue nga na ndö ti azo ti kodro ti mo.”