Sigingo 5 - Mbeti ti Nzapa - Tënë so amu fini

Moïse na Aaron asi na ndo ti gbia Faraon

¹ Na pekoni, Moïse na Aaron ague, awara gbia Faraon si ala tene na lo: “Tënë so KOTA GBIA, Nzapa ti Israel atene ayeke so: ‘Zia azo ti mbi ague na benyama si ala sara matanga kâ ti gonda na mbi.’ ”

² Faraon atene: “KOTA GBIA ni ayeke zo wa si mbi ma yanga ti lo ti zia lege na azo ti Israel ti gue so? Mbi hinga KOTA GBIA ni pepe; mbi yeke zia nga azo ti Israel ti gue pepe!”

³ Moïse na Aaron atene: “Nzapa ti ahebro asi na e. Zia lege na e titene e tambula na ya ti lango ota, e gue na benyama ti mu *sandaga na KOTA GBIA, Nzapa ti e. Tongaso pepe, fade lo yeke fâ e na lege ti sioni kobela ti bubango kodro wala na lege ti bira.”

⁴ Gbia ti Ezipte atene na ala: “Moïse na Aaron, ala ye titene azo so ado kua ti ala azia ngbanga ti nyen? Ala kiri na yanga ti akua ti ala ti ngbaa!”

⁵ Faraon atene: “Fadeso, azo so aga gbani awe; ala ye titene azo ni azia kua ti ala?”

Faraon asara si kua ti azo ti Israel akiri aga ngangu

⁶ Gi na lango ni so, Faraon amu yanga na amakonzi ti kua ti Ezipte nga na akapita ti kua ti Israel, atene:

⁷ “Kozoni, ala yeke mu na azo ti Israel pere ti sara na biriki. Fadeso, ala kiri amu ni na ala pepe, ala wani, ala yeke gue ti gi ni.

⁸ Fade ala tene na azo ti Israel ni ti sara biriki so wungo ni ayeke gi tongana ti kozo; ala kiri na wungo ni na peko pepe. Azo ni ayeke azo ti sopo! Ndani laa ala yeke dekongo, atene: ‘E gue, e mu *sandaga na Nzapa ti e si!’

⁹ Ayeke nzoni ala mu na azo ni gba ti kua so ane na ndö ti ala titene ala sara, tongaso si ala zia be ti ala na atënë ti mvene so pepe!”

¹⁰ Amakonzi ti kua nga na akapita ti kua alondo na yangbo ti gbia asigigi si ala gue, atene na azo ti Israel, atene: “Tënë so Faraon atene ayeke so: A yeke kiri ti mu na ala pere pepe!

¹¹ Ala wani, ala gue, agi ni na ndo so ala lingbi ti wara ni daa. Me wungo ti biriki so ala yeke pika angba lakue tongana ti kozo.”

¹² Tongaso azo ti Israel akangbi tere ti ala na ya ti kodro ti Ezipte kue ti ro aholengo pere ti pika na biriki.

¹³ Amakonzi ti kua ni ayeke suku na ala, atene: “Ala hunzi kua ti ala! Na ya ti lango oko oko, ala sara wungo ti abiriki so a hunda na ala, legeoko tongana ti so lani a yeke mu na ala pere!”

¹⁴ Na ndö ni kue, azo ti Ezipte ayeke pika akapita ti kua ti azo ti Israel, ala so amakonzi azia ala na ndö ti azo ti kua ni so. Ala hunda ala, atene: “Ngbanga ti nyen si na ya ti alango so, ala sara wungo ti abiriki so a hunda na ala alingbi na wungo ti kozoni pepe so?”

¹⁵ Azo ti Israel so ayeke akapita ti kua aga adema tere ti ala na Faraon, atene: “Mo sara ye tongaso na e, azo ti kua ti mo ngbanga ti nyen?

¹⁶ Fadeso, a ke ti mu pere na e, azo ti kua ti mo, me a ngba ti hunda e ti pika abiriki. Na ndö ni kue, a yeke pika e, azo ti kua ti mo. Azo ti mo ayeke sara ye na legeni pepe!”

¹⁷ Faraon akiri tënë: “Ala yeke azo ti sopo; biani, ala yeke azo ti sopo! Ndani laa ala tene: ‘E gue, e mu *sandaga na KOTA GBIA!’

¹⁸ Fadeso, ala kiri na yanga ti kua ti ala! A yeke kiri ti mu na ala pere pepe, me ala yeke sara gi wungo ti abiriki so a hunda na ala.”

¹⁹ Azo ti Israel so ayeke akapita ti kua abaa so ye ni aga wâ na ala awe, ngbanga ti so a tene na ala, atene: “Fade ala yeke kiri na wungo ti abiriki ni na peko pepe. Na ya ti lango oko oko, ala yeke pika abiriki so wungo ni ayeke tongana ti kozo!”

²⁰ So ala sigigi na ndo ti Faraon awe, ala gue, awara Moïse na Aaron so ayeke ku ala kungo.

²¹ Ala tene na Moïse nga na Aaron, atene: “Ayeke nzoni KOTA GBIA abaa ye so ala sara so si lo fâ ngbanga na li ti ala! Ndali ti ala laa Faraon na azo ti gbe ti lo aye ti baa e na le pepe. So ayeke tongana ye ti bira laa ala mu na ala ti fâ e na ni!”

²² Moïse akiri na mbage ti KOTA GBIA si lo tene: “Kota Gbia, mo sara sioni na azo so ngbanga ti nyen? Mo tokua mbi ge ngbanga ti nyen?

²³ Ngbene ye so mbi gue na mbage ti Faraon si mbi tene tënë na iri ti mo, lo sara sioni na azo ti Israel; me ti mo, mo sara mbeni ye oko pepe ti zi azo ti mo!”