Sigingo 4 - Mbeti ti Nzapa - Tënë so amu fini

Nzapa afa ngangu ti lo na Moïse

¹ Moïse akiri tënë na *KOTA GBIA: “Mbi hinga ape! Fade azo ti Israel ayeke yeda na tënë ti mbi pepe, ala yeke ma nga yanga ti mbi pepe; me fade ala yeke tene: ‘KOTA GBIA asi na mo pepe!’ ”

² Tongaso KOTA GBIA ahunda lo, atene: “Nyen laa ayeke na maboko ti mo so?” Moïse akiri tënë: “Keke laa.”

³ KOTA GBIA atene: “Bi ni na sese!” Moïse abi keke ni na sese si aga ngbo. So Moïse abaa ngbo ni, lo kpe.

⁴ KOTA GBIA atene na lo: “Yoro maboko ti mo, mo gbu ngbo ni na mbage ti damba ti lo.” Moïse ayoro maboko ti lo si lo gbu ngbo ni. Ngbo ni akiri aga keke na ya ti maboko ti lo.

⁵ KOTA GBIA atene: “So laa ayeke fa biani na azo ti Israel atene, mbi KOTA GBIA, Nzapa ti akotara ti ala, Nzapa ti Abraham, Nzapa ti Isaac na Nzapa ti Jacob, mbi si na mo.”

⁶ KOTA GBIA akiri atene na lo: “Zia maboko ti mo na ndö ti kate ti mo, na gbe ti bongo ti mo.” Moïse asara ye ni. Me so lo zi maboko ti lo, buruma amu tere ni kue; le ti buruma ni avuru vurungo.

⁷ KOTA GBIA akiri atene: “Kiri na maboko ti mo ni na ndö ti kate ti mo, na gbe ti bongo ti mo.” Moïse asara ye ni. So lo kiri lo zi ni, maboko ti lo ni akiri aga nzoni.

⁸ KOTA GBIA atene lo: “Tongana ala yeda na tënë ti mo pepe, tongana ala ma yanga ti mo na kozo ye ti kpene ni pepe, fade ala yeke yeda na mo na use ye ti kpene ni.

⁹ Tongana ala ke ti yeda na aye ti kpene use so, tongana ala ma yanga ti mo pepe, fade mo to ngu ti Nil, mo tuku na ndö ti kuru sese. Fade ngu ni ayeke ga mene na ndö ti kuru sese ni.”

Nzapa asoro Aaron ti mu maboko na Moïse

¹⁰ Moïse atene na KOTA GBIA: “KOTA GBIA, mbi gbu gere ti mo! Ngbene ye ngbii asi laso, ataa so mo ngba ti tene tënë na mbi fadeso, mbi hinga ti tene tënë nzoni pepe. Yanga ti mbi na menga ti mbi ane nengo na tenengo tënë.”

¹¹ KOTA GBIA akiri tënë na lo, atene: “Zo wa laa asara yanga ti zo, zo wa? Zo wa laa asara si zo aga buburu, wala mê ti zo akanga, zo wa? Zo wa laa asara si zo abaa ndo, wala le ti zo akanga, zo wa? Ayeke mbi KOTA GBIA pepe?

¹² Fadeso, mo gue! Fade mbi yeke na mo tongana mo yeke tene tënë; mbi yeke fa na mo tënë so mo lingbi ti tene.”

¹³ Moïse atene: “KOTA GBIA, mbi gbu gere ti mo! Tokua mbeni zo nde so mo ye!”

¹⁴ Tongaso, ngonzo ti KOTA GBIA alondo tongana wâ na tere ti Moïse si lo tene: “Ita ti mo Aaron, zo ti mara ti Lévi ayeke daa pepe? Mbi hinga, mbi tene, yanga ti lo ayapu na tënë mingi! Baa, lo laa lo yeke ga ti wara mo so. Tongana lo baa mo ande, be ti lo ayeke duti na ngia.

¹⁵ Fade mo yeke tene tënë na lo, mo yeke zia na yanga ti lo tënë so lo lingbi ti tene. Ti mbi, fade mbi yeke na ala use kue na ndembe so ala yeke tene tënë; mbi yeke fa na ala ye so ala lingbi ti sara.

¹⁶ Lo laa lo yeke tene tënë na iri ti mo na azo; lo yeke tene peko ti tënë ti yanga ti mo na azo. Ti mo, mo yeke duti tongana nzapa ti lo.

¹⁷ Ti keke ni, mu na maboko ti mo! Fade mo yeke sara aye ti kpene na ni.”

Moïse akiri na tere ti azo ti lo

¹⁸ Moïse ague na mbage ti kogara ti lo Zetro si atene na lo: “Mbi gbu gere ti mo, mbi ye ti kiri na tere ti a-ita ti mbi na sese ti Ezipte, ti baa wala ala ngba na fini.” Zetro ayeda si atene na lo: “Gue nzoni!”

¹⁹ Kâ na sese ti Madian, KOTA GBIA atene na Moïse: “Kiri na Ezipte, ngbanga ti so azo so agi lege lani ti fâ mo so akui awe.”

²⁰ Tongaso Moïse amu wali ti lo na amolenge ti lo ti koli, lo zia ala na ndö ti lele si lo kiri na sese ti Ezipte. Lo mu na maboko ti lo keke so Nzapa atene na lo ti mu ni so.

²¹ KOTA GBIA atene na Moïse: “Na kiringo ti mo na Ezipte, mbi mu na mo ngangu ti sara aye ti dongo be. Fade mo yeke sara ni na dawa ti Faraon. Me ti mbi, mbi yeke sara titene be ti lo akpengba si lo yeke ke ti zia lege na azo ti Israel ti gue.

²² Tongaso, fade mo yeke tene na lo: Tënë so KOTA GBIA atene ayeke so: ‘Israel ayeke kozo molenge ti mbi ti koli.

²³ Mbi mu yanga na mo ti zia lege na lo ti gue ti voro mbi, me mo ke. Ndani laa, mbi yeke fâ kozo molenge ti mo ti koli.’ ”

²⁴ So lo yeke na lege ti guengo ni, na bi, na ndo so lo luti daa ti wu tere ti lo, KOTA GBIA aga nduru na lo si agi lege ti fâ lo.

²⁵ Hio tongaso, Sefora amu têne so yanga ni aza zango, lo fâ molenge ti lo ti koli na *ganza, lo mu *pito ti molenge ni, lo ndu na gere ti lo si lo tene: “Biani, mo yeke koli ti mbi ti mene.”

²⁶ Tongaso, KOTA GBIA azia Moïse. Sefora atene fade, atene: “Koli ti mbi ti mene” ndali ti fango ganza.

²⁷ KOTA GBIA atene na Aaron: “Gue na benyama, mo wara Moïse kâ.” Aaron ague, awara lo na hoto ti Nzapa si asu ngbangba ti lo.

²⁸ Moïse afa na Aaron atënë so kue KOTA GBIA aye ti tokua lo ngbanga ni. Lo fa nga na lo aye ti kpene so kue KOTA GBIA amu yanga na lo ti sarango ni.

²⁹ Moïse na Aaron ague, abongbi *akangba ti Israel kue.

³⁰ Aaron atene na ala peko ti atënë so kue KOTA GBIA atene na Moïse; lo sara nga aye ti kpene na le ti azo ni si ala baa.

³¹ Azo ti Israel ayeda na tënë ni si ala hinga atene, KOTA GBIA ayeke ga ti mu maboko na ala, ngbanga ti so lo baa lege so ala baa pasi. Tongaso, ala kuku akpo li ti ala na sese ti voro lo.