Sigingo 38 - Mbeti ti Nzapa - Tënë so amu fini

Gbalaka so a yeke ya sandaga na ndö ni

¹ Na pekoni, Besalel asara gbalaka na keke ti akasia ti ya *asandaga na ndö ni. Yongoro ni ayeke metere use na ndambo alingbi tere mbage na mbage kue. Yongo ni na nduzu metere oko na ndambo.

² Lo sara adidi na andangoro osio ti gbalaka ni, adidi ni na gbalaka ni abongbi kue si aga gi ye oko. Lo zia bengba wen na tere ni kue.

³ Lo sara agbakuru ti gbalaka ni kue na bengba wen: ata so a yeke tuku mburu ti wâ ti mafuta daa, apao, adu ti sembe so a yeke zia mene ti anyama daa, afurshete nga na akete ta ti zongo na dukani.

⁴ Lo mu bengba wen, lo sara na gbanda; lo zia gbanda ni na ya ti gbalaka ni, na yanga ni na gbeni, asi na nduzu, na ndambo ti gbalaka ni.

⁵ Lo kporo *akati osio, lo zia na andangoro ti gbanda so a sara na bengba wen so titene a yoro ayongoro keke ni daa.

⁶ Lo leke ayongoro keke ti akasia use si lo zia bengba wen na tere ni.

⁷ Lo yoro akeke ni na ya ti akati so ayeke na tere ti gbalaka ni mbage na mbage ti yo na ni. Lo sara gbalaka ni na *mabaya si ya ni ayeke senge.

⁸ Na pekoni, lo mu bengba wen, lo sara na mbeni kota sembe; lo sara nga gere ni na bengba wen. Lo mu tatara ti awali so ayeke sara kua na yanga ti da ti bongo so Nzapa na azo ti lo ayeke wara tere daa si lo sara na kota sembe ni.

Ya ti gbagba ti da so a zia nde ndali ti Nzapa

⁹ Na pekoni, lo sara gbagba ti da ni. Na mbage ti Mbongo, lo sara gbagba ni na bongo ti *len so akpengba kpengbango; bongo ni ayo metere baleoku.

¹⁰ A kanga bongo ni na *kongi nga na wen so a sara na wen ti nginza na tere ti angbongboro wen baleuse so a sara na bengba wen. Angbongboro wen ni aluti na ndö ti agere ni baleuse so a sara nga na bengba wen.

¹¹ Na mbage ti Banga, lo sara gi mara ti gbagba so: bongo ni ayo nga metere baleoku; lo kanga ni gi tongana ti so lo kanga ti mbage ti Mbongo so.

¹² Na mbage ti Do, bongo ni ayo metere baleuse na oku na mbage ti nduru ti gbagba ni. Lo kanga bongo ni na tere ti angbongboro wen baleoko so aluti na ndö ti agere ni baleoko.

¹³ Na mbage ti yanga ti gbagba ni na To, nduru ti gbagba ni ayeke nga metere baleuse na oku.

¹⁴ Na mbage ti yanga ti gbagba ni, yongo ti bongo ni ayeke metere mbarambara na ndambo; angbongboro wen ni ayeke ota nga na gere ni ota.

¹⁵ Na mbeni mbage ti yanga ti gbagba ni, yongo ti bongo ni ayeke metere mbarambara na ndambo; angbongboro wen ni ayeke ota nga na gere ni ota.

¹⁶ Abongo ti gbagba ni kue ayeke na len so akpengba kpengbango.

¹⁷ Agere ni so angbongboro wen ni aluti na ndö ni ayeke na bengba wen; akongi ni na awen ni ayeke na wen ti nginza; a zia wen ti nginza na li ti angbongboro wen ni kue; ti angbongboro wen ti gbagba ni kue, a kanga ni na wen so a sara na wen ti nginza.

¹⁸ Ridoo ti yanga ti gbagba ni, zo ti kpongo bongo na apendere nzoroko akpo nzoroko na tere ni na kamba ti len so nzoroko ni akpa le ti nduzu, lo bongbi ni na bongo so abe bengo, bengba bongo so ayeke za zango. Yongoro ti ridoo ni ayeke metere baleoko, yongo ni na nduzu metere use na ndambo, tongana ti tanga ti abongo ti gbagba ni.

¹⁹ Angbongboro wen osio so aluti na ndö ti gere ni osio ayeke na bengba wen; akongi ni ayeke na wen ti nginza; ali ti keke ni na awen ni, a zia wen ti nginza na tere ni kue.

²⁰ Awen so ala kpo ti gbu da ni na nduzu nga na awen so ala kpo ti gbu na gbagba ni kue ayeke na bengba wen.

Aye nde nde so a sara na da ni

²¹ So ayeke wungo ti aye so azo aga na ni ti sara na da so Nzapa ayeke duti daa; da so a yeke bata atêne so a su atënë ti mbuki na le ni. Azo ti mara ti Lévi adiko wungo ti aye ni alingbi na yanga so Moïse amu; ala diko ni na gbe ti Itamar, molenge ti wayango-sandaga Aaron.

²² Besalel, molenge ti Uri, molenge ti Hur, zo ti mara ti Juda asara aye so kue alingbi na yanga so KOTA GBIA amu lani na Moïse.

²³ Zo so amu maboko na lo ayeke Oholiab, molenge ti Ahisamak ti koli, zo ti mara ti Dan. Oholiab ayeke zo ti sarango ye na kode na tere ti atêne ti ngangu ngere, zo ti sarango ye ti kode, zo ti kpongo apendere nzoroko na kamba ti *len so akpengba kpengbango na tere ti bongo so nzoroko ni akpa le ti nduzu, bongo so abe bengo na bengba bongo so ayeke za zango.

²⁴ Lôro so azo amu ti sara na kua ti da so ayeke nde si ayeke nzoni kue, nengo ni kue ayeke kilo 877 na grame 300, alingbi na kilo so a yeke haka ka na ye na ya ti da ni.

²⁵ Wen ti nginza so azo aga na ni na ndembe so a diko wungo ti ala, nengo ni kue ayeke kilo 3 017 na grame 750, alingbi na nengo ti kilo so a yeke haka ka na ye na ndo so a zia nde ndali ti Nzapa.

²⁶ Nengo ti nginza ni alingbi grame oku ndali ti koli oko oko; wungo ti akoli so a diko ala ayeke 603 550; so ti tene ala so ngu ti ala alingbi ngu baleuse na ala so ngu ti ala ahon baleuse. A haka nginza ni na kilo so a yeke haka ka na ye na ndo so a zia nde ndali ti Nzapa.

²⁷ Azo amu kilo ti wen ti nginza 3 000, ala kporo ni si asara na agere 100 ti angbongboro keke ti da so ayeke nde si ayeke nzoni kue nga na agere ti ridoo ti ya ti da ni. Kilo 30 ayeke ndali ti gere ni oko oko.

²⁸ Na tanga ti kilo 17 na grame 750 so angba, ala mu ni si asara na akongi ti angbongboro wen ni nga na awen so a yeke kanga na tere ti angbongboro wen ni; ala zia nga ni na li ti angbongboro wen ni kue.

²⁹ Bengba wen so azo amu, nengo ni kue ayeke kilo 2 124.

³⁰ Azo ti sarango ye na kode amu ni si asara na agere ni so angbongboro keke ayeke luti na ndö ni; akeke ni ayeke na yanga ti da ti bongo so Nzapa na azo ti lo ayeke wara tere daa. Ala mu nga bengba wen ni asara na gbalaka, gbanda ni nga na agbakuru kue ti gbalaka ni;

³¹ agere ti angbongboro wen ti gbagba ni na angbongboro wen ti yanga ti gbagba ni; awen so a kpo ti gbu da ni na nduzu nga na awen so a kpo ti gbu na gbagba ni.