Sigingo 35 - Mbeti ti Nzapa - Tënë so amu fini

SARANGO DA SO AYEKE NDE SI AYEKE NZONI KUE 35–40 Lango ti wungo tere

¹ Moïse abongbi azo ti Israel kue si lo tene na ala: “Aye so KOTA GBIA amu yanga titene a sara ye alingbi na ni ayeke so:

² ‘Fade azo ayeke sara kua ti ala na ya ti lango omene, me lango mbarambara ni ayeke *lango ti wungo tere, lango so ala yeke zia nde ndali ti KOTA GBIA. Zo so ayeke sara kua na lango ni so, fade a yeke fâ lo.

³ Na ndo so kue ala lango daa, alingbi ala tingo wâ na lango ti wungo tere pepe.’ ”

Aye so azo ti Israel aga na ni ti sara na da ni

⁴ Moïse atene na bongbi ti azo ti Israel kue, atene: “Yanga so KOTA GBIA amu ayeke so:

⁵ Aye so ala yeke na ni, ala bongbi ambeni aga na ni na KOTA GBIA. Azo so kue aye ti mu ye na nzoni be, fade ala yeke ga na ni na KOTA GBIA; ala lingbi ti ga na aye tongana: lôro, wen ti nginza, bengba wen,

⁶ bongo so nzoroko ni akpa le ti nduzu na bongo so abe bengo, bengba bongo so ayeke za zango, bongo so a sara na *len nga na bongo so a sara na kua ti tere ti ngasa,

⁷ aporo ti akoli-taba so a zia bengba nzoroko na tere ni, apendere poro ti nyama, keke ti akasia,

⁸ mafuta ti ziango na ya ti alamba, fuku ti yombo ndali ti sarango na mafuta ti tukungo na li ti zo ti zia lo nde nga ndali ti fuku ti yombo ti zongo na wâ,

⁹ atêne ti kornaline na ambeni pendere têne nde nde ti ngangu ngere so a yeke zia na tere ti *efod nga na tere ti bozo so ayeke na ndö ti kate ti kota wayango-sandaga.

¹⁰ Ayeke nzoni azo so kue ayeke sara ye na kode si ayeke na popo ti ala aga asara aye so kue KOTA GBIA amu yanga daa:

¹¹ da so Nzapa ayeke duti daa, na bongo so a yeke bi na li ni, na ye ti kangango na li ti da ni, na *akongi ni, na *amabaya ni, na alate ni, na angbongboro keke ti da ni nga na gere ti da ni;

¹² sanduku ti mbuki na ayongoro keke ti yongo na ni, na ye ti kangango na yanga ti sanduku ni; na ridoo so akangbi ya ti da ni;

¹³ meza na ayongoro keke ti yongo na ni, na agbakuru ni kue nga na mapa so a yeke zia na dawa ti mbi;

¹⁴ gere ti alamba na agbakuru ni, alamba ni nga na mafuta ti ziango na ya ni;

¹⁵ gbalaka so a yeke zö dukani na ndö ni na ayongoro keke ti yongo na ni, na mafuta ti tukungo na li ti zo ti zia lo nde, na yombo so a yeke zö na wâ nga na ridoo ti yanga ti da so Nzapa ayeke duti daa;

¹⁶ gbalaka so a yeke ya na ndö ni *sandaga so a yeke gbi ni kue na wâ, na gbanda so a mu bengba wen a sara na ni, na ayongoro keke ti yongo na ni nga na agbakuru ni kue; kota sembe na gere ni;

¹⁷ abongo ti gbagba ni, na angbongboro wen ni, na agere ni nga na ridoo ti yanga ti gbagba ni;

¹⁸ awen so a kpo ti gbu da ni na nduzu, na awen so a kpo ti gbu na gbagba ni nga na akamba ni;

¹⁹ abongo ti awayango-sandaga titene ala sara na kua na ndo so ayeke nde si ayeke nzoni kue, abongo so a zia nde ndali ti wayango-sandaga Aaron, abongo so amolenge ti lo ayeke yu ti sara na kua ti wayango-sandaga.”

²⁰ Bongbi ti azo ti Israel kue azia Moïse ahon.

²¹ Na pekoni, azo kue ti nzoni be, na be ti ala wani abongbi ambeni ye aga na ni na KOTA GBIA ti sara na da ti bongo so KOTA GBIA na azo ti lo ayeke wara tere daa. Ala ga nga na aye ni ndali ti akua ti lo kue nga ti sara na abongo so a zia nde ndali ti kua ti Nzapa.

²² Tongaso akoli na awali ti nzoni be aga na aye nde nde so a sara na lôro: aye ti mê, akete palata, aye ti go, aye ti maboko wala *akati. Zo oko oko aga na aye ni na KOTA GBIA, lo ya ni na nduzu ti fa atene, lo mu na lo.

²³ Azo so kue ayeke na bongo so nzoroko ni akpa le ti nduzu, bongo so abe bengo, bengba bongo so ayeke za zango, bongo so a sara na len nga na bongo so a sara na kua ti tere ti ngasa, na aporo ti koli-taba so a sara nzoroko ti bengba na tere ni, wala apendere poro ti nyama, ala ga na ni.

²⁴ Azo so amu wen ti nginza wala bengba wen azia na mbage ndali ti KOTA GBIA, ala ga na ni. Azo so ayeke na keke ti akasia so alingbi titene a sara na akua nde nde, ala ga na ni.

²⁵ Awali so kue ayeke na ndara mingi afu na maboko, bongo so nzoroko ni akpa le ti nduzu, bongo so abe bengo, bengba bongo so ayeke za zango, bongo so a sara na len; ala mu abongo ni aga na ni.

²⁶ Ambeni wali so kue ayeke na ndara mingi afu ti ala bongo so a sara na kua ti tere ti ngasa.

²⁷ Amakonzi ti bongbi ti azo ni aga na atêne ti kornaline na ambeni pendere têne nde nde ti ngangu ngere so a yeke zia na tere ti efod nga na tere ti bozo so ayeke na ndö ti kate ti kota wayango-sandaga.

²⁸ Ala ga nga na fuku ti yombo nga na mafuta ti ziango na ya ti alamba, ti tukungo na li ti zo ti zia lo nde nga na fuku ti yombo so a yeke zö na wâ.

²⁹ Azo ti Israel kue, akoli wala awali ti nzoni be, na be ti ala wani, ala ga na aye so alingbi ti sara na kua so KOTA GBIA amu yanga daa na Moïse.

Besalel na Oholiab alondo ti sara kua

³⁰ Moïse atene na azo ti Israel, atene: “Ala baa, KOTA GBIA asoro Besalel, molenge ti Uri ti koli; Uri ayeke molenge ti Hur, zo ti mara ti Juda.

³¹ KOTA GBIA asara si yingo ti lo asi Besalel singo titene lo wara ndara, hingango ye nga na hingango ndo. Besalel ahinga ti sara aye ti kode nde nde:

³² ti gbu li na ndö ti aye ti pendere, aye ti lôro, aye ti wen ti nginza na ti bengba wen;

³³ lo hinga ti suru ya ti atêne ti zia na tere ti aye titene aga pendere, ti sara apendere ye ti kode na keke nga na mara ti akua nde nde ti kode.

³⁴ Na ndö ni kue, KOTA GBIA amu na lo matabisi ti fa aye ti kode ni so na azo tongana ti so lo mu na Oholiab, molenge ti Ahisamak, zo ti mara ti Dan.

³⁵ KOTA GBIA asara si ala wara ndara mingi ti sara na akua nde nde: kua ti sarango ye na kode na tere ti atêne ti ngangu ngere, kua ti sarango ye ti kode, kua ti kpongo apendere nzoroko na kamba ti *len so akpengba kpengbango na tere ti bongo so nzoroko ni akpa le ti nduzu, bongo so abe bengo na bengba bongo so ayeke za zango. Ala hinga ti sara akua nde nde, ala hinga ti gbu li ti sigigi na kode ti akua nde nde.