Sigingo 33 - Mbeti ti Nzapa - Tënë so amu fini

Nzapa amu yanga na Moïse ti londo ti gue

¹ KOTA GBIA atene na Moïse: “Londo na ndo so, mo gue, mo na azo so mo zi ala na sese ti Ezipte, mo sigigi na ala so. Ala gue na sese so mbi deba yanga ti mbi na Abraham, Isaac na Jacob ti mu na *ahale ti ala so.

² Fade mbi yeke tokua *ange ti mbi na dawa ti ala. Mbi yeke tumba azo ti Kanaan, azo ti mara ti Amori, ti Het, ti Perizi, ti Hivi nga na azo ti mara ti Yebus.

³ Ala gue na *kodro so ngu ti me ti bagara na mafuta ti wotoro asi singo daa. Ti mbi, mbi yeke gue na ala pepe, ngbanga ti so ala yeke azo ti ngangu li. Tongana mbi gue na ala, fade mbi yeke fâ ala kue na lege ti hunzi ala.”

⁴ So azo ni ama sioni tënë so, ala kue asara mua; zo oko ayu aye ti pendere ti lo pepe.

⁵ KOTA GBIA atene na Moïse: “Tene na azo ti Israel, mo tene: ‘Ala yeke azo ti ngangu li! Tongana mbi gue na ala gi na ya ti kete nduru ngbonga, fade mbi yeke fâ ala kue ti hunzi ala. Fadeso, ala zi aye ti baba ti ala ni; mbi yeke baa ye so mbi yeke sara ndali ti ala.’ ”

⁶ Gi so azo ti Israel alondo na hoto ti Horeb, ala to nda ti zi aye ti baba ti ala ni.

Da ti bongo so Nzapa na azo ti lo ayeke wara tere daa

⁷ Na ndembe so azo ti Israel ayeke sara bâbâ ti ala lakue, Moïse ayeke gbara da ti bongo ni yongoro na bâbâ ni. Lo di iri ni “da ti bongo so KOTA GBIA na azo ti lo ayeke wara tere daa.” Tongaso, azo so kue aye ti hunda KOTA GBIA na mbeni tënë, ala yeke sigigi na ya ti bâbâ ni si ala yeke gue na da ti bongo ni.

⁸ Lakue tongana Moïse ayeke gue na da ti bongo ni, azo kue ayeke londo na nduzu. Zo oko oko ayeke luti na yanga ti da ti lo si lo yeke baa peko ti Moïse ngbii Moïse ali na ya ti da ti bongo ni.

⁹ Tongana Moïse ali na ya ti da ti bongo ni awe, ngbongboro mbinda ayeke ga ti luti na yanga ti da ni; KOTA GBIA ayeke tene tënë na Moïse.

¹⁰ Azo kue ayeke baa ngbongboro mbinda so aluti na yanga ti da ti bongo ni. Tongaso azo kue ayeke londo si zo oko oko ayeke kuku, akpo li ti lo na sese na yanga ti da ti lo wani.

¹¹ KOTA GBIA ayeke tene tënë na Moïse le na le tongana ti so zo ayeke tene tënë na mba ti lo. Na pekoni, Moïse ayeke kiri na ya ti bâbâ. Me Josué, molenge ti Nune, maseka so ayeke mu maboko na Moïse ayeke ngba ti lo na ya ti da ti bongo ni.

KOTA GBIA na Moïse ayeke tene lisoro na popo ti ala

¹² Moïse atene na KOTA GBIA: “KOTA GBIA, ma si! Mo wani laa mo tene na mbi, mo tene: ‘Mo mu azo so mo gue na ala’. Me mo fa na mbi zo so alingbi ti mu maboko na mbi pepe. Lani mo laa mo tene na mbi, mo tene: ‘Mbi hinga mo na iri ti mo’; mo tene nga: ‘Mbi yeke baa mo na nzoni le.’

¹³ Fadeso, tongana mo baa mbi na nzoni le biani, fa na mbi lege ti mo si mbi hinga mo. Tongaso si fade mo yeke baa mbi na nzoni le. Ayeke nzoni mo hinga, mo tene, mara so ayeke azo ti mo.”

¹⁴ KOTA GBIA akiri tënë na Moïse, atene: “Mbi wani, mbi yeke gue na ala! Mo gi be ti mo pepe.”

¹⁵ Moïse akiri atene: “Tongana mo wani, mo gue na e pepe, mo hunda na e ti londo na ndo so pepe.

¹⁶ Biani, tongana mo gue na e pepe, nyen laa ayeke fa atene, mo baa mbi na azo ti mo na nzoni le? Ye so ayeke fa atene, mbi na azo ti mo, e yeke nde na tanga ti amara ti ndö ti sese so ayeke so, mo yeke na popo ti e si mo yeke tambula na e.”

¹⁷ KOTA GBIA atene na Moïse: “Ye so mo hunda so, fade mbi yeke sara ni, ngbanga ti so mbi baa mo na nzoni le si mbi hinga mo na iri ti mo.”

¹⁸ Moïse atene: “Mbi gbu gere ti mo, fa na mbi gonda ti mo titene mbi baa!”

¹⁹ KOTA GBIA akiri tënë: “Mbi yeke hon na dawa ti mo titene mo baa nzoni be ti mbi kue si mbi yeke di iri ti mbi so ayeke ‘KOTA GBIA’ na mo. Fade mbi yeke sara nzoni be na zo so mbi ye ti sara nzoni be na lo, mbi yeke baa mawa ti zo so mbi ye ti baa mawa ti lo.”

²⁰ KOTA GBIA atene: “Mo lingbi ti baa le ti mbi pepe. Biani, zo so abaa le ti mbi, lo yeke ngba na fini pepe.”

²¹ KOTA GBIA atene: “Baa mbeni ndo laa ayeke na tere ti mbi ge so. Fade mo yeke luti na ndö ti kota têne.

²² Tongaso, tongana gonda ti mbi ayeke hon, fade mbi yeke honde mo na ya ti du ti kota têne ni, mbi yeke kanga ndö ti mo na maboko ti mbi na ndembe so mbi yeke hon.

²³ Na pekoni, mbi yeke zi maboko ti mbi si mo lingbi ti baa gi peko ti mbi. Me le ti mbi, zo alingbi ti baa ni pepe.”