Sigingo 31 - Mbeti ti Nzapa - Tënë so amu fini

Azo ti sarango kua ti da so ayeke nde si ayeke nzoni kue

¹ KOTA GBIA atene na Moïse:

² “Baa, mbi soro Besalel, molenge ti Uri ti koli; Uri ayeke molenge ti Hur, zo ti mara ti Juda.

³ Mbi sara si yingo ti mbi asi lo singo titene lo wara ndara, hingango ye nga na hingango ndo. Lo hinga ti sara aye ti kode nde nde:

⁴ ti gbu li na ndö ti aye ti pendere, aye ti lôro, aye ti wen ti nginza na ti bengba wen;

⁵ lo hinga ti suru ya ti atêne ti zia na tere ti aye titene aga pendere, ti sara apendere ye ti kode na keke nga na mara ti akua nde nde.

⁶ Na ndö ni kue, mbi zia Oholiab, molenge ti Ahisamak na tere ti lo ti mu maboko na lo. Ahisamak ayeke zo ti mara ti Dan. Mbi mu nga ndara mingi na azo oko oko so kue ayeke sara ye na kode titene ala sara aye so kue mbi mu yanga na mo ti sara:

⁷ da ti bongo so mbi na azo ti mbi e yeke wara tere daa, sanduku so a zia na ya ni atêne so a su atënë ti mbuki na le ni, ye ti kangango na yanga ti sanduku ni, agbakuru ti da ni kue,

⁸ meza na agbakuru ni, gere ti alamba ti *nzoni ni, na agbakuru ni kue, gbalaka so a yeke zö dukani na ndö ni,

⁹ gbalaka so a yeke ya *sandaga so a yeke gbi ni kue na wâ na ndö ni na agbakuru ni kue, kota sembe na gere ni,

¹⁰ abongo ti awayango-sandaga, abongo so a zia nde ndali ti wayango-sandaga Aaron, abongo so amolenge ti lo ayeke yu ti sara na kua ti wayango-sandaga,

¹¹ mafuta ti tukungo na li ti zo ti zia lo nde, yombo so a yeke zö na ndo so ayeke nde si ayeke nzoni kue. Fade azo ti sarango ye na kode ayeke sara aye ni alingbi gi na yanga so mbi mu na mo.”

Lango ti wungo tere

¹² KOTA GBIA atene na Moïse:

¹³ “Mu yanga na azo ti Israel, mo tene: ‘Alingbi ala bata *alango ti wungo tere nzoni. Biani, lango ti wungo tere ayeke mbeni ye ti dango be na popo ti mbi na ala ngu na ngu. Ye ni ayeke dabe ti ala atene, mbi laa mbi yeke KOTA GBIA so ayeke sara titene ala ga nde si ala ga nzoni kue.

¹⁴ Tongaso, alingbi ala bata lango ti wungo tere ni. Ti ala, lango ni so ayeke mbeni lango so a zia nde. Zo so ayeke sara si lango ni so aga sioni si lo sara kua na lango ni so, fade a yeke tumba lo na ya ti bongbi ti azo si a yeke fâ lo.

¹⁵ Fade ala yeke sara kua ti ala na ya ti lango omene, me lango mbarambara ni ayeke lango ti wungo tere, lango ti wungo tere so a zia nde ndali ti mbi KOTA GBIA. Zo so a yeke sara kua na lango ti wungo tere, fade a yeke fâ lo.

¹⁶ Fade azo ti Israel ayeke bata lango ti wungo so ngu na ngu. So ayeke *mbuki so ayeke ngba kpu na kpu.

¹⁷ Lango ti wungo tere ayeke mbeni ye ti dango be na popo ti mbi na azo ti Israel kpu na kpu. Biani, mbi sara yayu na sese na ya ti lango omene. Me na lango mbarambara ni, mbi sara kua pepe, mbi wu tere ti mbi.’ ”

¹⁸ So KOTA GBIA ahunzi ti tene tënë na Moïse na li ti hoto ti Sinai, lo mu na lo atêne use so lo wani, lo su atënë ti ndia na le ni.