Sigingo 30 - Mbeti ti Nzapa - Tënë so amu fini

Gbalaka so a yeke zö dukani na ndö ni

¹ “Fade ala yeke mu keke ti akasia, ala sara na mbeni gbalaka ti zö dukani na ndö ni.

² Fade yongoro ni ayeke santimetere baleoku alingbi tere mbage na mbage; yongo ni na nduzu metere oko. Adidi ti andangoro osio ti gbalaka ni na gbalaka ni ayeke bongbi kue ti ga gi ye oko.

³ Ala yeke zia lôro ti nzoni ni na tere ti gbalaka ni kue, na ndö ni, na tere ni mbage na mbage kue nga na tere ti adidi ni. Ala yeke mu lôro, ala leke na mbeni pendere ye, ala zia na tere ti yanga ti gbalaka ni, angoro ni kue.

⁴ Ala yeke mu lôro, ala sara na *akati use si ala yeke kanga na tere ti gbalaka ni mbage na mbage, na gbe ti ye pendere ni. Ala yeke yoro ayongoro keke na ya ti akati ni ti yo na gbalaka ni.

⁵ Ala yeke mu keke ti akasia si ala sara na ayongoro keke ni; ala yeke zia lôro na tere ni kue.

⁶ Ala yeke zia gbalaka ni na dawa ti ridoo so ahonde sanduku so a zia na ya ni atêne so a su atënë ti mbuki na le ni; so ti tene ridoo so ayeke na dawa ti ye ti kangango na yanga ti sanduku ni. Na ndo so laa, Moïse, mbi na mo, e yeke wara tere.

⁷ Lakue na ndaperere, fade Aaron ayeke zö dukani so afun nzoni na ndö ti gbalaka ni, na ndembe so lo yeke gue ti leke alamba ti ndo so ayeke nde si ayeke nzoni kue so.

⁸ Lakue na lakui, lo yeke zö dukani na ndö ti gbalaka ni, na ndembe so lo yeke gue ti zia wâ na ya ti alamba. Fade ala yeke ngba ti zö dukani ni na dawa ti mbi KOTA GBIA ngu na ngu, kpu na kpu.

⁹ Fade ala yeke zö dukani nde na ndö ti gbalaka ni pepe, wala *sandaga so a yeke gbi ni kue na wâ, wala sandaga ti farini; ala yeke tuku sandaga ti samba na ndö ni pepe.

¹⁰ Fani oko na ya ti ngu oko, fade Aaron ayeke zi siokpari na tere ti gbalaka ni. Lo yeke zia mene na ndö ti adidi ti gbalaka ni; mene ti nyama so a ya na sandaga ti zi siokpari na li ti azo. Na peko ti ngu oko oko, lo yeke kiri ti sara gi mara ti ye so, ngu na ngu. Gbalaka so ayeke duti nde si ayeke duti nzoni kue ahon atanga ni ndali ti mbi KOTA GBIA.”

Lapo ndali ti da so ayeke nde si ayeke nzoni kue

¹¹ KOTA GBIA akiri atene na Moïse:

¹² “Na ndembe so mo yeke diko wungo ti azo ti Israel, fade zo oko oko ayeke futa mbeni ye na mbi KOTA GBIA ti bata fini ti lo. Tongaso, fade mbeni kpale oko ayeke si na ala pepe na ndembe ti dikongo wungo ti azo ni.

¹³ Azo so kue a yeke diko wungo ti ala, fade zo oko oko ayeke mu le ti nginza so nengo ni ayeke grame oku, alingbi na ndambo ti le ti nginza oko so a yeke mu ka na ndo so a zia ni nde ndali ti Nzapa. Nginza so ala yeke futa so ayeke duti ti mbi KOTA GBIA.

¹⁴ Akoli ti Israel so kue ngu ti ala alingbi ngu baleuse na ala so ngu ti ala ahon baleuse si a diko wungo ti ala awe, fade ala yeke futa nginza ni na mbi KOTA GBIA.

¹⁵ Zo ti mosoro na wayere ayeke futa gi oko wungo ti nginza ni: le ti nginza so alingbi na grame oku; ala yeke mu ahon so pepe, ala yeke mu nga na gbe ni pepe. Zo oko oko ayeke futa wungo ti nginza so na mbi KOTA GBIA ti bata fini ti lo.

¹⁶ Tongana mo ro nginza ni kue na maboko ti azo ti Israel awe, fade mo yeke mu ni ti sara na akete kete kua na tere ti da ti bongo so mbi KOTA GBIA, mbi na azo ti mbi e yeke wara tere daa. Tongaso, mbi yeke dabe ti mbi na azo ti Israel si mbi yeke bata fini ti ala.”

Kota sembe

¹⁷ KOTA GBIA atene na Moïse:

¹⁸ “Fade ala yeke mu bengba wen, ala sara na mbeni kota sembe so a yeke sukula maboko na gere daa; ala yeke sara nga gere ti sembe ni na bengba wen. Ala yeke zia kota sembe ni na popo ti da ti bongo so KOTA GBIA na azo ti lo ayeke wara tere daa nga na gbalaka; ala yeke to ngu daa.

¹⁹ Aaron na amolenge ti lo ti koli ayeke sukula maboko ti ala nga na gere ti ala na ngu ni.

²⁰ Kozo titene ala li na ya ti da ti bongo so mbi KOTA GBIA, mbi na azo ti mbi, e yeke wara tere daa, ala yeke sukula tere ti ala na ngu ni, tongaso si ala kui pepe. Kozo titene ala gue nduru na tere ti gbalaka ti ya *sandaga na mbi nga ti gbi sandaga ni kue na wâ ndali ti mbi,

²¹ fade ala yeke sukula maboko ti ala na gere ti ala, tongaso si ala kui pepe. Ndia so ayeke ngba ngu na ngu, kpu na kpu ndali ti Aaron na *ahale ti lo.”

Mafuta ti tukungo na li ti zo ti zia lo nde

²² KOTA GBIA atene na Moïse:

²³ “Mo mu apendere yombo: kilo oku ti *mire ti ngu ni, kilo use na ndambo ti sinamome so afun nzoni, kilo use na ndambo ti kanele so afun nzoni

²⁴ na kilo oku ti kase, alingbi na kilo so a yeke haka ka na ye na ndo so a zia ni nde ndali ti Nzapa. Mo yeke mu nga litere omene ti mafuta ti olive.

²⁵ Mo mu aye so na zo ti sarango yombo; lo yeke bongbi ni ti sara na mafuta ti tukungo na li ti zo ti zia lo nde ndali ti mbi.

²⁶ Mo yeke mu mafuta ni ti fi na tere ti da ti bongo so mbi na azo ti mbi, e yeke wara tere daa, nga na tere ti sanduku so a zia na ya ni atêne so a su atënë ti mbuki na le ni.

²⁷ Mo yeke fi nga mafuta ni na tere ti meza na agbakuru ni kue; na tere ti gere ti alamba na agbakuru ni kue; na tere ti gbalaka so a yeke zö dukani na ndö ni;

²⁸ na tere ti gbalaka so a yeke ya na ndö ni *sandaga so a yeke gbi ni kue na wâ nga na agbakuru ni kue; na tere ti kota sembe nga na gere ni.

²⁹ Mo yeke zia aye so nde si ala yeke ga aye so ayeke nde si ayeke nzoni kue ahon atanga ni. Zo so kue wala ye so kue ayeke ndu ni ayeke wara ye ti peko ni.

³⁰ Mo yeke tuku mafuta so na li ti Aaron na amolenge ti lo si mo yeke zia ala nde titene ala sara kua na mbi tongana awayango-sandaga.

³¹ “Fade mo yeke tene na azo ti Israel: ‘So ayeke mafuta ti tukungo na li ti azo nga na tere ti aye ti zia ala nde. Mafuta so ayeke ngba ti sara na kua ti mbi ngu na ngu.

³² Alingbi zo asara mafuta so na tere ti lo pepe. Alingbi zo atara ti sara mara ni nga pepe. Biani, a zia mafuta so nde awe; alingbi ala baa ni tongana ye so a zia ni nde.

³³ Zo so atara ti sara mara ti mafuta so si lo zia ni na tere ti mbeni senge zo, fade a yeke tumba lo na ya ti bongbi ti azo.’ ”

Lege ti sarango yombo so a zia ni nde

³⁴ KOTA GBIA akiri atene na Moïse: “Mo mu ayombo so fion ni ayeke fun nzoni: storaks, oniks na galbanum. Mo mu dukani ti nzoni ni so wungo ni alingbi tere, mo bongbi ni na ayombo ni so.

³⁵ Mbeni zo ti sarango yombo ayeke bongbi ni na ingo ti sara si aga yombo ti nzoni ni so a zia nde ndali ti mbi.

³⁶ Mo yeke nika mbage ti yombo ni titene aga fuku, mo yeke tuku ni na dawa ti sanduku so a zia na ya ni atêne so a su atënë ti mbuki na le ni si ayeke na ya ti da ti bongo so mbi na azo ti mbi e yeke wara tere daa. Na ndo so laa mbi na mo, e yeke wara tere. Ti ala, ala lingbi ti baa yombo ni tongana ye so ayeke nde si ayeke nzoni kue ahon atanga ni.

³⁷ Alingbi zo atara ti sara mara ti yombo so pepe. Ala mu yombo so ti sara na ye ndali ti ala wani pepe; me ala baa ni tongana ye so a zia nde ndali ti KOTA GBIA.

³⁸ Zo so ayeke sara mara ti yombo so titene lo ma fion ni, fade a yeke tumba lo na ya ti bongbi ti azo.”