Sigingo 27 - Mbeti ti Nzapa - Tënë so amu fini

Gbalaka so a yeke ya asandaga na ndö ni

¹ “Fade ala yeke sara gbalaka na keke ti akasia ti ya *asandaga na ndö ni. Yongoro ni metere use na ndambo alingbi tere mbage na mbage kue. Yongo ni na nduzu metere oko na ndambo.

² Ala yeke sara adidi na andangoro osio ti gbalaka ni, adidi ni na gbalaka ni ayeke bongbi kue ti ga gi ye oko. Ala yeke zia bengba wen na tere ni kue.

³ Ala yeke sara agbakuru ti gbalaka ni kue na bengba wen: ata so a yeke tuku mburu ti wâ ti mafuta ti anyama daa, apao, adu ti sembe so a yeke zia mene ti anyama daa, afurshete nga na akete ta ti zongo na dukani.

⁴ Ala yeke mu bengba wen, ala sara na gbanda; ala yeke mu nga bengba wen, ala sara na *akati osio ti zia na ndangoro oko oko ti gbanda ni.

⁵ Ala yeke zia gbanda ni na ya ti gbalaka ni, na yanga ni na gbeni, asi na nduzu, na ndambo ti gbalaka ni.

⁶ Ala yeke leke ayongoro keke ti akasia use si ala yeke zia bengba wen na tere ni.

⁷ Ala yeke yoro ayongoro keke ni so na ya ti akati so ayeke na tere ti gbalaka ni, mbage na mbage ti yo na ni.

⁸ Ala yeke sara gbalaka ni na *mabaya si ya ni ayeke senge. Ala yeke sara ni alingbi gi na kode so mbi fa na mo ge na li ti hoto so.”

Gbagba ti da so Nzapa ayeke duti daa

⁹ “Fade ala yeke sara gbagba ti da so Nzapa ayeke duti daa. Na mbage ti Mbongo, ala yeke sara gbagba ni na bongo ti *len so akpengba kpengbango; bongo ni ayeke yo metere baleoku.

¹⁰ A yeke kanga bongo ni na *kongi nga na wen so a sara na wen ti nginza na tere ti angbongboro wen baleuse so a sara na bengba wen. Angbongboro wen ni ayeke luti na ndö ti agere ni baleuse so a sara nga na bengba wen.

¹¹ Na mbage ti Banga, ala yeke sara gi mara ti gbagba so: bongo ni ayeke yo nga metere baleoku; ala yeke kanga ni gi tongana ti so ala kanga ti mbage ti Mbongo so.

¹² Na mbage ti Do, bongo ni ayeke yo metere baleuse na oku na mbage ti nduru ti gbagba ni. Ala yeke kanga bongo ni na tere ti angbongboro wen baleoko so aluti na ndö ti agere ni baleoko.

¹³ Na mbage ti yanga ti gbagba ni na To, nduru ti gbagba ni ayeke duti nga metere baleuse na oku.

¹⁴ Na mbage ti yanga ti gbagba ni, yongo ti bongo ni ayeke duti metere mbarambara na ndambo; angbongboro wen ni ayeke duti ota nga na agere ni ota.

¹⁵ Na mbeni mbage ti yanga ti gbagba ni, yongo ti bongo ni ayeke duti metere mbarambara na ndambo; angbongboro wen ni ayeke duti ota nga na agere ni ota.

¹⁶ Na yanga ti gbagba ni, ala yeke zia mbeni ridoo so ayo metere baleoko. Zo ti kpongo bongo na apendere nzoroko ayeke kpo nzoroko na tere ni na kamba ti len so akpengba kpengbango, ala bongbi ni na bongo so nzoroko ni akpa le ti nduzu, bongo so abe bengo na bengba bongo so ayeke za zango. Ala yeke kanga ridoo ni na tere ti angbongboro wen osio so aluti na ndö ti gere ni osio.

¹⁷ Awen so a sara na wen ti nginza so, ala yeke kanga ni na tere ti angbongboro wen ti gbagba ni kue. Akongi ni ayeke duti nga na wen ti nginza si agere ni ayeke duti na bengba wen.

¹⁸ Yongoro ti gbagba ni ayeke duti metere baleoku, nduru ni metere baleuse na oku; ridoo so a sara na len so akpengba kpengbango so, yongo ni na nduzu ayeke duti metere use na ndambo. Agere ti angbongboro keke ni ayeke duti na bengba wen.

¹⁹ Ti agbakuru so a yeke sara na kua ti da so Nzapa ayeke duti daa, awen so ala kpo ti gbu da ni na nduzu nga na awen so ala kpo ti gbu na gbagba ni, ala sara ni kue na bengba wen.”

Mafuta ndali ti gere ti alamba

²⁰ “Ti mo Moïse, fade mo yeke mu yanga na azo ti Israel titene ala ga na mo mafuta ti olive so ayeke nzoni ahon atanga ni kue, tongaso si wâ ayeke za na ya ti lamba lakue na lakui.

²¹ Fade Aaron na amolenge ti lo ti koli ayeke zia gere ti alamba ni na ya ti da ti bongo so Nzapa na azo ti lo ayeke wara tere daa. Ala yeke zia ni na dawa ti ridoo so ahonde sanduku ti mbuki. Fade alamba ni ayeke za na dawa ti mbi, KOTA GBIA na lakui ngbii asi na ndaperere. Ndia so ayeke ngba ngu na ngu ndali ti *ahale ti ala ti angoi kue.”