Sigingo 20 - Mbeti ti Nzapa - Tënë so amu fini

Andia baleoko

¹ Tongaso Nzapa atene atënë so kue, atene:

² “Mbi laa mbi yeke KOTA GBIA, Nzapa ti mo; mbi laa mbi sara si mo sigigi na Ezipte, ndo so lani mo yeke ngbaa daa.

³ “Alingbi mo voro ambeni nzapa nde pepe, gi mbi oko.

⁴ “Alingbi mo sara mbeni yanda ndali ti mo pepe, wala mbeni ye so akpa ye so ayeke na le ti nduzu, wala ye so ayeke na ndö ti sese, wala ye so ayeke na ya ti ngu na gbe ti sese.

⁵ Alingbi mo kuku na gbe ti ayanda so pepe, mo voro ala pepe, ngbanga ti so mbi KOTA GBIA Nzapa ti mo, mbi yeke Nzapa so ayeke sara mbanda ti azo ti lo. Azo so asara sioni ti ke mbi, mbi yeke kiri na sioni ti azo ni na ndö ti *ahale ti ala, ngbii asi na molongo ota ni wala molongo osio ni.

⁶ Me azo so aye mbi si ala yeke sara ye alingbi na atënë ti yanga ti mbi, mbi yeke sara nzoni be na ahale ti ala ngbii asi na molongo saki oko.

⁷ “Alingbi mo di iri ti mbi KOTA GBIA Nzapa ti mo senge senge pepe. Biani, zo so adi iri ti mbi senge senge, mbi yeke zia lo senge pepe.

⁸ “Alingbi mo dabe ti mo na *lango ti wungo tere, mo zia ni nde ndali ti mbi.

⁹ Mo sara akua ti mo kue na ya ti lango omene.

¹⁰ Me lango mbarambara ni ayeke lango ti wungo tere ndali ti mbi KOTA GBIA, Nzapa ti mo. Na lango ni so, alingbi mo sara kua oko pepe; ataa mo, ataa molenge ti mo ti koli, ataa molenge ti mo ti wali, ataa zo ti kua ti mo ti koli, ataa zo ti kua ti mo ti wali, ataa anyama ti mo, ataa wande so ayeke lango na kodro ti mo.

¹¹ Biani, na ya ti lango omene, mbi KOTA GBIA, mbi sara yayu, sese, kota ngu-ingo na aye so kue ayeke na ya ni. Me na lango mbarambara ni, mbi wu tere ti mbi. Ndani laa mbi sara tufa na ndö ti lango ti wungo tere si mbi zia ni nde ndali ti mbi.

¹² “Alingbi mo ne babâ ti mo na mama ti mo, tongaso si gigi ti mo ayo na ndö ti sese so mbi KOTA GBIA Nzapa ti mo, mbi mu na mo.

¹³ “Alingbi mo fâ zo pepe.

¹⁴ “Alingbi mo gi wali wala koli ti zo pepe.

¹⁵ “Alingbi mo nzi pepe.

¹⁶ “Alingbi mo tene mvene na li ti mba ti mo pepe na le ti ngbanga.

¹⁷ “Alingbi mo sara nzara ti da ti mba ti mo pepe; mo sara nzara ti wali ti mba ti mo pepe, ataa zo ti kua ti lo ti koli, ataa zo ti kua ti lo ti wali, ataa bagara ti lo, ataa lele ti lo, ataa ye so kue lo yeke na ni.”

¹⁸ Azo ti Israel kue ama sungbango ti bekpa na toto ti adidi ti koli-taba. Ala kue abaa wâ ti bekpa na guru ti wâ so ayeke sigigi na li ti hoto; tere ti ala kue ado na mbeto si ala luti yongoro.

¹⁹ Ala tene na Moïse: “Mo wani, mo tene tënë na e si e ma. Me e ye titene Nzapa atene tënë na e pepe, tongaso pepe e yeke kui.”

²⁰ Moïse atene na azo ni, atene: “Ala sara mbeto pepe! Nzapa aga ti tara gi be ti ala, tongaso si ala kpe mbeto ti lo si ala sara siokpari pepe.”

²¹ Azo ni aluti yongoro, me Moïse ague nduru na tere ti mbinda so avuko vukongo si Nzapa ayeke daa so.

Ndia ndali ti gbalaka

²² KOTA GBIA atene na Moïse: “Tënë so mo yeke tene ande na azo ti Israel ayeke so: ‘Ala wani abaa na le ti ala: mbi ngba na yayu kâ laa mbi tene tënë na ala.

²³ Alingbi ala mu wen ti nginza wala lôro, ala leke na ambeni nzapa nde ti zia na tere ti mbi pepe; ala sara ambeni nzapa nde ndali ti ala wani pepe.

²⁴ Ala mu sese asara na mbi gbalaka. Na ndö ni, fade ala yeke ya na mbi *asandaga ti ala so a yeke gbi ni kue na wâ, asandaga ti ala ti beoko, ataba ti ala, angasa ti ala nga na abagara ti ala. Na ndo so kue mbi yeke sara titene azo adabe ti ala na iri ti mbi, mbi yeke ga na mbage ti ala si mbi yeke sara tufa na ndö ti ala.

²⁵ Me tongana ala mu têne ti leke na mbi mbeni gbalaka, fade ala leke ni na têne so a de tere ni dengo pepe, ngbanga ti so na dengo tere ti têne ni na wen, andaa têne ni aga *sioni awe.

²⁶ Fade wayango-sandaga ayeke ko na ndö ti gbalaka ti mbi na eskalie pepe, tongaso si azo abaa tere ti lo ti koli pepe.’ ”